Goditje ndaj mashtrimeve me donacione: Pranga dy drejtuesve të një kompanie për keqpërdorim të fondeve ndërkombëtare

Policia e Kosovës ka ndërmarrë një aksion të mërkurën, duke vënë në pranga dy persona nën dyshimin e bazuar se kanë shpërdoruar fondet e siguruara nga partnerët ndërkombëtarë. Të arrestuarit, të identifikuar me inicialet H.L. dhe T.M., shtetas të Republikës së Kosovës, akuzohen për veprën penale “Mashtrimi lidhur me pranimin e fondeve nga komuniteti ndërkombëtar”. Sipas informacioneve të bëra publike nga autoritetet policore, dyshimet lidhen me aktivitetin e tyre në cilësinë e drejtorit dhe menaxherit të një subjekti biznesor, ku përmes veprimeve të kundërligjshme pretendohet se kanë keqpërdorur mbështetjen financiare të dhënë nga donatorët e huaj.