Në fokus ekonomia dhe inovacioni: Kryeministri Kurti zhvillon takim në Paris me nobelistin Philippe Aghion

Kryeministri i Republikës së Kosovës, Albin Kurti, ka zhvilluar një takim në kryeqytetin francez me ekonomistin e shquar dhe profesorin e njohur, Philippe Aghion. Profesor Aghion, i cili u kurorëzua me Çmimin Nobel për Ekonomi për vitin 2025, shquhet për teorinë e tij që ndërthur inovacionin si motor të zhvillimit ekonomik me politika që garantojnë mbrojtje sociale, duke u bazuar te parimi i mbrojtjes së individit përballë ndryshimeve ekonomike, e jo te ruajtjes së vendeve të caktuara të punës. I konsideruar ndër mendjet më të ndritura të ekonomisë bashkëkohore, Aghion ushtron veprimtarinë e tij akademike në Collège de France, INSEAD dhe London School of Economics and Political Science (LSE), ndërsa për vite me radhë ka qenë pjesë e stafit akademik edhe në Universitetin e Harvardit dhe Institutin e Teknologjisë të Masaçusetsit (MIT). Gjatë këtij takimi, kreu i ekzekutivit kosovar dhe ekonomisti i njohur trajtuan çështje që lidhen me ecurinë ekonomike të Kosovës, duke vënë theksin te fushat me perspektivë të lartë zhvillimi, me anë të sektorit të teknologjisë që zë 6% të Bruto Produktit Vendor dhe vijon të shënojë ngritje pozitive. Diskutimet u shtrinë gjithashtu rreth inovacionit evropian, sfidave dhe mundësive që paraqet inteligjenca artificiale, përgjegjësisë së shtetit në mbrojtjen e punëtorëve, përmirësimit të aftësive profesionale dhe procesit të tranzicionit energjetik. Një vëmendje e veçantë iu kushtua modelit të arsimit dual në Kosovë, i cili mbështetet në praktikat më të mira gjermane dhe zvicerane. Me këtë rast, profesori Aghion ka dhënë vlerësime pozitive për angazhimin e Qeverisë së Kosovës në funksionalizimin e këtij sistemi, i cili shërben si urë lidhëse mes shkollimit profesional dhe kërkesave praktike të tregut të punës.