Debati për raportin e BE-së, deputetja e Vetëvendosjes: Progresi i vendit tonë është i pakundërshtueshëm

Gjatë seancës plenare të sotme ku po diskutohet mbi raportin vjetor të Bashkimit Evropian për Kosovën, deputetja Liza Gashi ka marrë fjalën në emër të grupit parlamentar të Lëvizjes Vetëvendosje, duke theksuar të arriturat dhe hapat para të vendit. Edhe pse dokumenti i Brukselit flet kryesisht për ngecje në fusha të ndryshme, ligjvënëseja e majtë ka insistuar se zhvillimet pozitive janë të dukshme dhe nuk mund të mohohen. "Për ne si grup parlamentar i Lëvizjes Vetëvendosje, së bashku me aleatët tanë, ky debat parlamentar po ashtu është një mundësi e mirë për të prezantuar sukseset dhe përparimin e pamohueshëm të Republikës së Kosovës në rrugëtimin e Bashkimit Evropian", u shpreh ajo gjatë fjalës së saj. Duke ritheksuar se integrimi evropian mbetet prioritet strategjik, Gashi ka veçuar heqjen e vizave gjatë vitit 2024 si një arritje kyçe të ekzekutivit të drejtuar nga Lëvizja Vetëvendosje. "Gjatë kësaj dekade, kemi përafruar legjislacionin me standardet evropiane, kemi zgjeruar marrëdhëniet tregtare, por mbi të gjitha, kemi liberalizuar vizat për vendin tonë", u shpreh ajo. Duke vazhduar fjalën e saj, ajo shtoi se tashmë çdo qytetar i Republikës së Kosovës ka mundësinë të udhëtojë pa pengesa brenda hapësirës Schengen dhe më gjerë. Në fjalën e saj, Gashi preku edhe çështjen e ngecjes së aplikimit të vendit, duke theksuar se mosshqyrtimi i kërkesës së Kosovës për anëtarësim në BE përbën pengesë jo vetëm për Prishtinën zyrtare, por vë në pikëpyetje edhe vetë besueshmërinë e procesit të zgjerimit të Unionit. Në fund, deputetja ka adresuar edhe bllokadën institucionale, duke e cilësuar atë si një nga faktorët kryesorë që kanë ndikuar në ngadalësimin e proceseve.