Përplasje në Komisionin e Buxhetit: Hoti dhe Murati 'përleshen' për barrën e organizimit të Prishtina 2030

Përgatitjet për ngjarjen e madhe sportive "Lojërat Mesdhetare Prishtina 2030" kanë shkaktuar debate të ashpra institucionale, kësaj radhe mes deputetit të Lidhjes Demokratike të Kosovës, Avdullah Hoti, dhe ministrit të Financave, Hekuran Murati, gjatë shqyrtimeve në Komisionin për Buxhet. Gjatë fjalës së tij, ligjvënësi i opozitës ka drejtuar kritika të ashpra ndaj ekzekutivit për shmangie nga përgjegjësitë, duke kërkuar që Qeveria të garantojë financimin e plotë të infrastrukturës së nevojshme, nëse autoritetet komunale të kryeqytetit dështojnë në realizimin e tyre. Duke iu drejtuar përfaqësuesve të Qeverisë, Hoti u shpreh se ekzekutivi duhet të tregojë seriozitet dhe të marrë kontrollin e plotë të procesit, duke përfshirë fondet e duhura në buxhetin shtetëror për Prishtinën dhe komunat e tjera ku do të shtrihen aktivitetet. "Lojërat Olimpike (Mesdhetare), me Komunën e Prishtinës “kërrsh” jeni bërë duke u shtyrë njëri me tjetrin. Duhet të marrësh pronësi, ti qeveri je. T’i të marrësh pronësi për të gjitha ato, për krejt buxhetin që duhet për Lojërat Olimpike edhe t’i inkuadrosh ti në buxhet nëse Komuna e Prishtinës nuk e bën, edhe komunat tjera sepse do të shpërndahen gjithandej, duhet të marrësh pronësi. Në 2030-tën do të ndodhin, më 2027 ose 2028 do të duhej të përfundonin plotësisht", theksoi Hoti. Në krahun tjetër, ministri i Financave, Hekuran Murati, është kundërpërgjigjur duke sqaruar se mjetet financiare janë parashikuar tashmë brenda portofolit të Ministrisë së Sportit, ndërsa ka theksuar se pengesë aktuale mbetet mungesa e vendndodhjeve të përcaktuara saktë për disa nga disiplinat sportive që kërkojnë ndërtime të reja. "Tek çështja e Lojërat Mesdhetare, edhe këtu kemi situatën e ngjajshme meqenëse ende nuk ka saktësim të lokacioneve për të gjitha sportet ku parashihet të ketë ndërtim. Ideja ka qenë që të ketë një grumbullim dhe në momentin që ka qartësim, Ministria e Sportit mund të vazhdojë me zbatimin e projektit por buxhetimi, pra jemi munduar që ta akomodojmë të gjithë shumën në buxhet të Ministrisë së Sportit", deklaroi Murati. Ky duel verbal vjen në një periudhë kritike kur rruga drejt "Prishtina 2030" po shoqërohet me sfida të shumta, duke vënë në pah domosdoshmërinë e një bashkëpunimi më të ngushtë ndërinstitucional për të përmbyllur me sukses projektet kapitale brenda afateve kohore.