I kërkuar për vrasjen e dy vëllezërve në Shkodër, bie në prangat e policisë greke shqiptari që fshihej me dokumente të rreme

Operacioni ndërkombëtar i koduar “The Wanted” ka çuar në arrestimin e një 44-vjeçari shqiptar në Greqi, i cili ishte shpallur në kërkim ndërkombëtar pasi rezultonte i dënuar me 22 vjet heqje lirie për një ngjarje të rëndë të ndodhur vite më parë. Personi në fjalë, iidentifikuar si Zef Preldakaj (i njohur gjithashtu me emrin Fran Preldakaj), kishte arritur t'i shpëtonte drejtësisë duke përdorur të dhëna të rreme në shtetin fqinj, ku paraqitej me identitetin Nikolin Pali dhe kishte ndryshuar edhe datëlindjen. Zbulimi i identitetit të tij të vërtetë u bë i mundur falë analizimit të detajuar të të dhënave biometrike nga ekspertët e Institutit të Policisë Shkencore në kuadër të bashkëpunimit policor ndërkufitar. Sipas informacioneve zyrtare nga Policia e Shtetit, ky operacion është finalizuar si pasojë e një koordinimi të ngushtë ndërmjet Drejtorisë së Interpol Tiranës, Institutit të Policisë Shkencore dhe autoriteteve ligjzbatuese greke, përmes ndërmjetësimit të Interpol Athinës. Preldakaj ishte dënuar përfundimisht në vitin 2008 nga Gjykata e Shkodrës me 22 vjet burgim për akuzën e “Vrasjes në rrethana të tjera cilësuese, kundër dy ose më shumë personave”, e kryer në bashkëpunim. Krim i rëndë për të cilin ai ishte shpallur fajtor daton në vitin 2002, në fshatin Shtoj i Vjetër të Shkodrës. Hetimet e kohës kishin dokumentuar se Preldakaj, së bashku me dy persona të tjerë, ishin nisur drejt biznesit të dy vëllezërve me qëllim kryerjen e një grabitjeje të arkës ditore. Gjatë përplasjes, ndërsa njëri nga vëllezërit u përpoq t'i merrte armën njërit prej autorëve, bashkëpunëtori i Preldakaj qëlloi me armë zjarri, duke lënë të vdekur në vend të dy vëllezërit. Gjatë kësaj ngjarjeje, roli i Preldakaj kishte qenë ruajtja e derës së subjektit për të garantuar mbarëvajtjen e planit kriminal, para se të largohej së bashku me dy autorët e tjerë. Megjithatë, aktiviteti kriminal i 44-vjeçarit nuk kufizohet vetëm në Shqipëri, pasi ai dyshohet gjithashtu si autor i një tjetër vrasjeje të dyfishtë të ndodhur në Greqi në vitin 2020, ku dy viktima, një shtetas grek dhe një ukrainase, u gjetën pa shenja jete brenda një automjeti në zonën e Korinthit. Gjatë qëndrimit në Greqi, ai ka pasur një të kaluar të ngarkuar me precedentë të tjerë penalë, duke përfshirë grabitje me armë dhe shkelje të ligjeve për armët në vitin 2014, shkelje në fushën e lojërave të fatit më 2013, si dhe posedim lëndësh narkotike në vitin 2005. Aktualisht, Interpol Tirana po vijon procedurat në bashkëpunim të ngushtë me homologët grekë për të zbardhur plotësisht dosjen e tij kriminale dhe për të përgatitur dokumentacionin e nevojshëm për ekstradimin e tij drejt Shqipërisë.