Gaza nën alarm humanitar: Përmbytjet fatale ndezin frikën e përhapjes së sëmundjeve

Bordi i Paqes, i themeluar me nismën e kreut të Shtëpisë së Bardhë, Donald Trump, i ka kërkuar urgjentisht autoriteteve izraelite ndërmarrjen e masave të menjëhershme përballë krizës së rëndë humanitare në Rripin e Gazës, e cila u përshkallëzua ndjeshëm si pasojë e reshjeve të dendura të shiut. Prej fundjavës së kaluar, stuhitë dhe shirat e rrëmbyeshëm kanë përmbytur dhjetëra mijëra çadra ku strehohen palestinezët e zhvendosur, duke shkaktuar gjithashtu humbjen e jetës së të paktën pesë personave. Përmes një reagimi zyrtar në platformën X, Bordi i Paqes theksoi se kjo nuk përbën thjesht një sfidë të stinës së dimrit, por një emergjencë humanitare kritike që kërkon reagim të menjëhershëm. Institucioni ndërkombëtar i ka bërë thirrje qeverisë së Izraelit që të autorizojë hyrjen e materialeve jetike për ndërtimin e strehave të përkohshme, rehabilitimin e rrjetit të ujësjellësit dhe kanalizimeve, si dhe menaxhimin e ujërave të zeza, duke kërkuar kështu përmbushjen e detyrimeve sipas planit të Trump për paqen në Gaza. Në cilësinë e organit mbikëqyrës për zbatimin e armëpushimit në enklavën palestineze, Bordi i Paqes vlerësoi përpjekjet paraprake që po shqyrtohen nga Tel Avivi, por nënvizoi se masat aktuale janë krejtësisht të pamjaftueshme përballë situatës në terren. Nga ana e saj, Agjencia e OKB-së për Fëmijë (UNICEF) ngriti alarmin se Izraeli ka bllokuar hyrjen e pajisjeve të domosdoshme për riparimin e një rezervuari uji, duke paralajmëruar rrezikun e shembjes së tij, çka do të sillte përmbytje të reja dhe rrezik serioz për shëndetin publik përmes shpërthimit të sëmundjeve. Ndërkohë, autoritetet vendase kanë denoncuar se gjatë konfliktit kundër Hamasit, infrastruktura e ujit dhe mjetet e specializuara për pompimin e ujit janë dëmtuar ose shkatërruar rëndë.