Albin Kurti nga Parisi: Qendrat e avancuara shkencore, shembull frymëzues për të ardhmen e Kosovës

Kryeministri në detyrë i Kosovës, Albin Kurti, ka ndërmarrë një vizitë zyrtare në kryeqytetin francez, ku është njohur nga afër me punën e “Palais de la Découverte”, një prej qendrave më të njohura muzeale dhe të edukimit shkencor në Paris, me synimin për të eksploruar mundësi bashkëpunimi dhe aplikimi të një modeli të ngjashëm në Kosovë. Gjatë kësaj vizite në këtë institucion që shtrihet brenda kompleksi të “Grand Palais”, kreu i ekzekutivit kosovar u prit nga personalitete të shquara të fushës, përfshirë Sylvie Retailleau, presidente e “Universcience” – institucioni publik francez që menaxhon dy qendrat madhore shkencore “Palais de la Découverte” dhe “Cité des Sciences et de l’Industrie” – si dhe nga Sophie Biecheler, drejtoreshë e deleguar për Çështje Institucionale, Territoriale dhe Ndërkombëtare. Sipas shpjegimeve të dhëna gjatë takimit, kjo qendër përfshin hapësira dhe galeri të dedikuara fushave të ndryshme të dijes, si astronomia, gjeoshkenca, kimia, fizika, elektrika, matematika dhe informatikë, të pasuruara gjithashtu me një planetarium modern dhe laboratorë të specializuar për testime e simulime. Veprimtaria e këtyre qendrave shquhet për harmonizimin e programeve të tyre me kurrikulat shkollore, duke u ofruar fëmijëve që nga moshat e hershme mundësinë e lidhjes direkte mes mësimnxënies dhe ekspozitave praktike. Përqendrimi te ndërmjetësimi shkencor dhe muzeologjia për të rinjtë ka për qëllim kryesor stimulimin e kuriozitetit dhe kultivimin e mendimit kritik, ndërkohë që krahas ekspozitave të përhershme dhe të përkohshme, funksionojnë edhe ato itinerante që lëvizin në rajone të ndryshme. Në bisedën e zhvilluar me Sylvie Retailleau, e cila mban gjithashtu eksperiencën e ish-ministres së Arsimit të Lartë dhe Kërkimit Shkencor, u vu theksi te rëndësia e afrimit të fëmijëve me shkencën përmes qasjeve shumëdisiplinare, një praktikë kjo që Kurti e cilësoi si tejet të vlefshme për t'u zbatuar në Kosovë. Delegacioni pati gjithashtu mundësinë të shohë nga afër punimet renovuese që po zhvillohen aktualisht në “Palais de la Découverte”, në prag të rihapjes së madhe të paraparë për pranverën e vitit të ardhshëm.