Zbardhet vendimi: Pse Gjykata e Pejës vendosi ta mbyllë për publikun seancën ndaj Jeton Sylajt për kanosjen e Arlinda Zekajt

Të enjten, më 12 nëntor, në Gjykatën Themelore në Pejë është parashikuar të nisë procesi gjyqësor kundër Jeton Sylajt, i akuzuar për kanosjen e ish-bashkëshortes së tij, Arlinda Zekaj. Kjo e fundit tragjikisht u vra mbrëmjen e 25 tetorit 2026 në Vitomiricë të Pejës, vetëm pak kohë pasi kishte denoncuar në polici dhunën e ushtruar nga ish-bashkëshorti. Për vrasjen e saj, si autor i dyshuar ndodhet kunati i saj, Albert Sylaj. Gjykata ka marrë vendim zyrtar që seanca e shqyrtimit fillestar të zhvillhet dyerve të mbyllura për publikun. Sipas aktvendimit të lëshuar më 10 nëntor 2026 nga gjyqtarja Selvije Morina-Zejnaj, kjo masë u ndërmarrë me kërkesë të Prokurorisë, me qëllim parësor mbrojtjen e jetës private dhe familjare të të pandehurit, palës së dëmtuar dhe personave të tjerë të përfshirë në këtë procedurë penale. Në kërkesën e saj, Prokuroria kishte kërkuar mbylljen e plotë të seancës, ose alternativisht, përjashtimin e publikut gjatë leximit të procesverboleve të marrjes në pyetje, raporteve të komunikimit me fëmijën, raporteve informative e psikologjike, si dhe gjatë shfaqjes së video-incizimeve. Pasi mbrojtja e viktimave dhe ajo e të pandehurit shprehën pajtimin e tyre me këtë propozim, trupi gjykues konstatoi se kërkesa e organit të akuzës është plotësisht e bazuar në ligj. Në marrjen e këtij vendimi, Gjykata ka mbajtur parasysh faktin se vepra penale e kanosjes dyshohet se është kryer në kuadër të rrethit familjar. Për pasojë, gjatë seancave gjyqësore pritet të diskutohen hollësi shumë intime dhe personale që lidhen me jetën e të pandehurit dhe familjarëve të tij, përfshirë prova që përmbajnë të dhëna të ndjeshme dhe informacione rreth fëmijës së mitur. Institucioni i drejtësisë ka vlerësuar se shpalosja publike e çështjeve që i përkasin sferës intime dhe familjare do të dëmtonte rëndë dinjitetin dhe privatësinë e palëve. Një vëmendje e veçantë i është kushtuar interesit më të mirë të fëmijës së mitur, duke theksuar se mbrojtja e identitetit dhe e mirëqenies së tij mbetet prioritet absolut gjatë gjithë rrjedhës së procedurës gjyqësore. Gjykata ka konkluduar se ky kufizim përputhet plotësisht me dispozitat e Kodit të Procedurës Penale, pasi ekziston një interes i ligjshëm për të garantuar integritetin e jetës private të të gjithë pjesëmarrësve në këtë proces. Kujtojmë se Prokuroria Themelore në Pejë kishte ngritur aktakuzë ndaj Jeton Sylajt më 23 tetor 2026. Sipas aktakuzës, në dhjetor të vitit 2025, në një kohë ende të pasaktë në fshatin Vitomiricë të Pejës, i pandehuri e kishte kanosur seriozisht me jetë ish-bashkëshorten e tij. Ai dyshohet se e kishte urdhëruar atë që të largohej nga shtëpia, duke e kërcënuar përmes telefonit me fjalët: “kam me të mbyt, kam me të ngre zhag, as ushtria s'ka me mujt me të hek nga dora ime”.