Zgjedhja e presidentit dhe nisma për Specialen, Arian Tahiri zbardh qëndrimin e PDK-së

Shefi i Grupit Parlamentar të Partisë Demokratike të Kosovës, Arian Tahiri, ka deklaruar se për këtë subjekt politik prioritet absolut në këtë periudhë mbetet plotësim-ndryshimi i ligjit për Dhomat e Specializuara, ndërkohë që çështja e kreut të shtetit kërkon domosdoshmërisht një konsensus të gjerë politik. Gjatë një konference për media, Tahiri theksoi se projektligji për Gjykatën Speciale nuk duhet të ndërlidhet me procesin e zgjedhjes së presidentit të vendit. Ai bëri thirrje që të marrin fund skenarët që synojnë prodhimin e një krize institucionale, duke ritheksuar se PDK-ja kundërshton fuqishëm idenë e shkuarjes në zgjedhje të reja parakohshme. “Çështja e presidentit është çështje e konsensusit politik. PDK ka qenë e angazhuar me i shmang zgjedhjet, nuk duhet me bë situata e inskenime që me prodhuar zgjedhje pas zgjedhjeve, jem duke e dëmtuar shtetin, lodh qytetarët e Kosovës. Duhet mu ndal dramat dhe me ju qas me përgjegjësi këtij procesi, por për Partinë Demokratike të Kosovës, kryefjalë është ligji për Specialen”, u shpreh ai. Sipas aktgjykimit të Gjykatës Kushtetuese, data 6 tetor paraqet afatin e fundit për zgjedhjen e presidentit të ri. Ndërkaq, kryetari i PDK-së, Bedri Hamza, ka shprehur gatishmërinë e partisë për t'u përfshirë në dialog rreth çështjes së presidentit, me kushtin që paraprakisht të votohet nisma ligjore për ndryshimin e Dhomave të Specializuara.