Nations League: Shqipëria pret Finlandën në “Arenën Kombëtare”, historia dhe bilanci i përballjeve direkte

Kombëtarja shqiptare e futbollit do të zbresë në fushë mbrëmjen e së enjtes për të disputuar takimin e parafundit të vlefshëm për Ligën e Kombeve (Nations League) kundër Finlandës, një sfidë kjo që do të transmetohet drejtpërdrejt në platformën Digitalb. Në ambientet e “Arenës Kombëtare”, përfaqësuesja kuqezi do të synojë një rezultat pozitiv për të ruajtur dhe konfirmuar kreun e Grupit C1 në këtë kompeticion. Përballja e kësaj të enjteje shënon duelin e tetë në histori mes Shqipërisë dhe skuadrës finlandeze, ku statistikat historike anojnë nga përfaqësuesja skandinave. Deri më tani, nordikët numërojnë pesë fitore, ndërsa kuqezinjtë kanë dalë triumfues në dy raste, dhe vetëm një takim është mbyllur në barazim. Një pjesë e konsiderueshme e historikut mes dy ekipeve përfshin ndeshjet e vlefshme për eliminatoret e Kupës së Botës. Rrugëtimi i tyre ka nisur në kuadër të kualifikueseve të Botërorit 1974, ku ndeshja e parë u zhvillua më 21 qershor 1972 dhe u fitua 1-0 nga finlandezët. Në sfidën e kthimit, e cila u luajt në tokën shqiptare më 10 tetor 1973, ishte Shqipëria ajo që mori fitoren me të njëjtin rezultat, 1-0. Përballjet mes dy vendeve u përsëritën sërish në eliminatoret e Botërorit 1982. Më 3 shtator 1980, kuqezinjtë triumfuan me shifrat 2-0, kurse në ndeshjen e kthimit të zhvilluar më 2 shtator 1981, Finlanda fitoi 2-1. Dy dekada më vonë, Kombëtarja shqiptare dhe ajo finlandeze u takuan sërish në rrugëtimin drejt Botërorit 2002, ku skandinavët fituan të dyja përballjet: 2-1 më 2 shtator 2000 dhe 2-0 në takimin e datës 1 shtator 2001. I vetmi barazim mes dy kombëtareve daton në 7 janar 2002, në kuadër të një turneu miqësor me katër skuadra të zhvilluar në Bahrein, ku sfida u mbyll me rezultatin 1-1. Ndërkohë, përballja e fundit mes tyre mbetet ajo e luajtur më 3 tetor në Helsinki, në kuadër të këtij edicioni të Nations League, ku Finlanda arriti të përmbyste rezultatin duke fituar 2-1.