Lëvizje në kampin dardan: Hajdari lë grumbullimin, Avdullahu largohet përkohësisht

Përfaqësuesja e Kosovës ka pësuar ndryshime në përbërje pak ditë para dy ndeshjeve të rëndësishme që do t'i zhvillojë kundër Izraelit dhe Austrisë. Mbrojtësi Albian Hajdari është detyruar të largohet nga kampi stërvitor i “Dardanëve” në Debrecen, pasi procesi i rikuperimit nga dëmtimi nuk do të përfundojë në kohë për t'i dhënë mundësi atij të paraqitet në dy sfidat e ardhshme. Në anën tjetër, mesfushori Leon Avdullahu ka marrë leje të përkohshme për t'u larguar nga grumbullimi për shkak të disa arsyeve familjare. Sipas planeve, ai pritet t'i rikthehet grupit dhe t'i bashkohet skuadrës sapo të kalojë kjo situatë. Këto zhvillime sjellin sfida shtesë për stafin teknik në fazën përgatitore para ndeshjeve radhazi.