Fushë Kosovë: Gjendet e mitura e raportuar e zhdukur, me urdhër të prokurorit dërgohet në strehimore

Ka përfunduar me sukses kërkimi për një vajzë të mitur në Fushë Kosovë, e cila kërkohej nga anëtarët e familjes së saj. Sipas të dhënave zyrtare nga raporti 24-orësh i Policisë së Kosovës, rasti në fjalë ishte denoncuar më 9 nëntor, rreth orës 19:00. Denoncimi ishte bërë nga një burrë kosovar, i cili kishte njoftuar organet e rendit se mbesa e tij ishte larguar nga banesa dhe se nuk kishin asnjë informacion për vendndodhjen e saj. Autoritetet policore bëjnë të ditur se e mitura është paraqitur vetë në stacionin policor. Menjëherë pas kësaj, me vendim dhe urdhër të prokurorit të rastit, ajo është dërguar në strehimore. Organet kompetente po vazhdojnë hetimet për të sqaruar plotësisht të gjitha rrethanat e kësaj ngjarjeje.