Merz bën presion që të plotësonet obligimet ndaj Ukrainës

Kancelari gjerman Friedrich Merz (CDU)  u ka bërë thirrje të gjitha shteteve anëtare të Bashkimit Evropian që të japin një "kontribut të drejtë” për mbulimin e mungesës financiare prej miliarda eurosh për Ukrainën. Në një letër drejtuar Presidentit të Këshillit Evropian, António Costa, ai paralajmëroi në mënyrë indirekte se mund të bllokojë përparimin në çështje të tjera financiare, nëse nuk arrihet një angazhim i përbashkët për mbështetjen e Ukrainës. Sipas letrës, të siguruar nga Agjencia Gjermane e Shtypit (dpa), një angazhim i tillë është "parakusht thelbësor” për zgjidhjen e këtij problemi dhe për diskutimin e temave të tjera, veçanërisht atyre me pasoja financiare. Për vitin e ardhshëm, Ukraina përballet me një mungesë financiare prej 45 miliardë eurosh. Merz kërkon gjithashtu që gjatë negociatave për buxhetin afatgjatë të BE-së për periudhën 2028-2034 të gjendet një zgjidhje e përbashkët, e mbështetur nga të gjitha shtetet anëtare, për të garantuar financim të qëndrueshëm dhe shumëvjeçar për Ukrainën, e cila vazhdon të përballet me agresionin rus. Bashkimi Evropian synon të arrijë një marrëveshje për kuadrin e ri financiar deri në fund të këtij viti. "Çështje e sigurisë së përbashkët evropiane” "Mbështetja e Ukrainës është një çështje e sigurisë sonë të përbashkët evropiane dhe kjo duhet të reflektohet edhe në ndarjen e barrës së ndihmës”, shkroi Merz në letrën drejtuar Costës. Ai i kërkoi Presidentit të Këshillit Evropian që kjo temë të trajtohet si prioritet në samitin informal të BE-së, që do të zhvillohet të premten në Dublin. Më herët, Komisioni Evropian kishte vlerësuar se boshllëku financiar për vitin e ardhshëm arrin në 70 miliardë euro, nga të cilat BE-ja pritet të mbulojë 45 miliardë euro. Vitin e kaluar, Bashkimi Evropian kishte miratuar 90 miliardë euro ndihmë për Ukrainën për periudhën 2026-2027. Megjithatë, këto fonde nuk konsiderohen të mjaftueshme. Presidenti ukrainas Volodymyr Zelenski kishte kërkuar qysh në tetor edhe 70 miliardë euro shtesë nga aleatët perëndimorë për të financuar mbrojtjen e vendit ndaj agresionit rus. Pas kësaj kërkese, liderët e BE-së i kërkuan Komisionit Evropian të paraqesë një propozim për sigurimin e fondeve shtesë. Bullgaria dhe Sllovakia kundër ndihmës së re Megjithatë, disa shtete anëtare po shfaqin rezistencë. Presidenti bullgar Rumen Radev dhe Kryeministri sllovak Robert Fico kanë deklaruar se vendet e tyre nuk do të mbështesin paketa të reja financiare të BE-së për Ukrainën. Edhe Hungaria dhe Republika Çeke konsiderohen partnere të pasigurta në këtë çështje. Ndërkohë, Kryeministri hungarez Péter Magyar pritet të zhvillojë sot një takim me Kancelarin Friedrich Merz në Berlin. Mbështetja për Ukrainën pritet të jetë një nga temat kryesore të bisedimeve. Gjermania mbetet donatori më i madh i Ukrainës brenda Bashkimit Evropian, çka shpjegon edhe këmbënguljen e Merzit për një shpërndarje më të gjerë dhe më të drejtë të barrës financiare mes vendeve anëtare.