Lukashenko i bën ftesë të hapur Uashingtonit: Bashkohuni me ne dhe Moskën në projektin e madh industrial

Kreu i shtetit bjellorus, Aleksandër Lukashenko, njoftoi të martën se ka arritur një dakordësi me homologun e tij rus, Vladimir Putin, për përfshirjen e gjigantit energjetik rus "Gazprom" në ndërtimin e një fabrike të re për prodhimin e plehrave azotike në Bjellorusi. Megjithatë, në një hap të papritur, ai ka ftuar edhe Shtetet e Bashkuara të bëhen pjesë e kësaj nisme. Duke qenë një nga aleatët më të afërt të Moskës, Bjellorusia ka ndërmarrë hapa konkretë për të shkrirë akullin dhe për të rivendosur marrëdhëniet me Uashingtonin, pas një periudhe të gjatë izolimi dhe sanksionesh të rënda nga vendet perëndimore. Kjo dinamikë e re diplomatike mes Minskut dhe administratës së udhëhequr nga Presidenti i SHBA-së, Donald Trump, ka shënuar një intensifikim të ndjeshëm që nga viti 2025. Gjatë deklaratës së tij, Lukashenko konfirmoi se tashmë është përcaktuar edhe lokacioni se ku do të ngrihet kompleksi i ri industrial, pas marrëveshjes përfundimtare të arritur me Kremlinin. "Ne duhet t’u bëjmë një ofertë amerikanëve. Ata kanë nevojë për plehra, përfshirë ato azotike, prandaj i ftojmë t'i bashkohemi këtij projekti duke sjellë edhe teknologjinë e tyre amerikane", u shpreh ai. Megjithatë, lideri bjellorus theksoi se projekti nuk varet ekskluzivisht nga ky bashkëpunim. "Nëse ata refuzojnë, ne jemi të gatshëm ta ndërtojmë atë së bashku me 'Gazprom'-in dhe rusët, për ta shitur më pas produktin e gatshëm në treg", shtoi ai. Kjo deklaratë vjen menjëherë pas fjalës së Presidentit Donald Trump të hënën, i cili bëri të ditur se Uashingtoni po angazhohet në bisedime për të siguruar një marrëveshje për blerjen e plehrave të potasiumit nga Bjellorusia, me kushte më ekonomike krahasuar me çmimet aktuale që SHBA-ja i paguan Kanadasë për të njëjtin produkt.