Ekzekutimi në Spanjë: Kush ishte Luka Beqiraj, vlonjati me të shkuar të errët kriminale

Detaje të reja kanë dalë në dritë lidhur me vrasjen e 39-vjeçarit Luka Beqiraj, i cili u ekzekutua me armë zjarri në zonën e Orihuela Costa, në provincën e Alicantes, Spanjë. Ngjarja e rëndë ndodhi gjatë paradites, në një ambient të frekuentuar pranë fushave të tenisit (padel), ku viktima u qëllua për vdekje në sy të dëshmitarëve të shumtë. Sipas raportimeve nga vendngjarja, autori iu afrua viktimës në distancë të afërt dhe hapi zjarr, duke e lënë të vdekur në vend. Pas krimit, agresori u largua me shpejtësi nga zona duke përdorur një skuter elektrik, një veprim që ka nxitur dyshimet e hetuesve spanjollë për një vrasje të mirëplanifikuar dhe të realizuar me pagesë, ndërsa po hetohen lidhjet e mundshme me grupet e strukturuara kriminale që operojnë në rajon. Viktima, Luka Beqiraj nga Vlora, rezulton të ketë qenë një personazh i njohur për organet e drejtësisë, si në Shqipëri ashtu edhe në Itali. Përplasjet e tij me ligjin nisin që në vitin 2016, kur u arrestua në qytetin e tij të lindjes për akuzën e plagosjes së rëndë me dashje. Në vitin 2019, emri i Beqirajt u lakua në një operacion ndërkombëtar antidrogë, të koduar “Lulet e Pranverës”. Ky aksion i përbashkët mes autoriteteve shqiptare dhe atyre italiane goditi një rrjet kriminal të trafikut të drogës dhe armëve. Në Shqipëri, gjatë operacionit u ndaluan gjashtë persona, mes të cilëve Luka Beqiraj, Bilbil Kabello, Arbnor Hoxhaj, Denis Pashaj, Kujtim Elmazi dhe Kristian Llanaj, nën hetimin e prokurorëve Pranvera Hoxha dhe Përparim Kulluri. Një vit pas arrestimit, në vitin 2020, Beqiraj u dënua me 4 vite e gjysmë burg dhe gjobë prej 24 mijë eurosh. Në Itali, operacioni “Lulet e Pranverës” ishte edhe më i gjerë, duke çuar në pranga 27 persona, 21 prej të cilëve shtetas shqiptarë. Ky rrjet kriminal, sipas hetimeve të Karabinierisë së Lecces dhe Guardia di Finanza, dyshohet se kishte trafikuar rreth 10 tonë lëndë narkotike, kryesisht marijuanë, nga Shqipëria drejt bregdetit të Salentos, për t'u shpërndarë më pas në të gjithë territorin italian. Përveç drogës, organizata akuzohej edhe për trafikim të armëve dhe municioneve, duke shfrytëzuar rrugët detare për aktivitetet e paligjshme.