Vështirësi për “Dardanët”: Hajdari dëmtohet dhe humbet sfidat e radhës, largohet edhe Avdullahu

Kombëtarja e Kosovës është përballur me mungesa të rëndësishme në prag të ndeshjes tejet të rëndësishme kundër Izraelit, e cila do të zhvillohet në Hungari. Mbrojtësi Albian Hajdari nuk ka arritur të rikuperohet nga dëmtimi dhe është detyruar të lërë grumbullimin, duke mos i qëndruar në dispozicion trajnerit as përballë Austrisë në stadiumin “Fadil Vokrri”. Përveç repartit defensiv, probleme ka pasur edhe në mesfushë, ku Leon Avdullahu është larguar përkohësisht nga kampi verdheblu për shkak të disa çështjeve familjare. Federata e Futbollit të Kosovës ka bërë të ditur se futbollisti i Hoffenheimit pritet t'i bashkohet skuadrës në një kohë të afërt. Nëpërmjet një njoftimi zyrtar, FFK ka sqaruar situatën e dy lojtarëve: “Albian Hajdari largohet nga grumbullimi, Leon Avdullahu lirohet përkohësisht. Mbrojtësi i Kombëtares së Kosovës, Albian Hajdari, është larguar nga grumbullimi i Dardanëve në Debrecen, pasi është konstatuar se rikuperimi i tij nga lëndimi nuk do të jetë i mundur në kohë për dy ndeshjet e radhës, kundër Izraelit dhe Austrisë”. Tutje në kumtesë thuhet: “Përkundër angazhimit maksimal të stafit mjekësor dhe përpjekjeve për ta rikuperuar futbollistin, Hajdari nuk do të jetë në dispozicion të përzgjedhësit Franco Foda për këto dy ndeshje. Ndërkohë, për arsye familjare, përkohësisht nga grumbullimi është liruar edhe mesfushori Leon Avdullahu. Ai do t’i bashkohet ekipit sa më shpejt që të jetë e mundur”. Në aspektin e renditjes, Kosova aktualisht numëron tre pikë në Grupin G, duke u pozicionuar pas Austrisë. Përfaqësuesja jonë deri më tani ka regjistruar një fitore ndaj Irlandës në “Fadil Vokrri” dhe një humbje 3-1 në udhëtim kundër Austrisë. Kalendari parashikon që më 1 tetor Kosova të matë forcat me Izraelin në tokën hungareze, ndërsa më 4 tetor do të presë në shtëpi, në stadiumin “Fadil Vokrri”, kombëtaren e Austrisë.