Kërcënim serioz për Ramush Haradinajn: Llogaria e lidhur me rusët vë në shënjestër familjen e tij

Kryetari i Aleancës për Ardhmërinë e Kosovës, Ramush Haradinaj, është bërë cak i një kërcënimi të hapur publik, i cili është shpërndarë përmes një komenti në faqen e tij zyrtare në rrjetet sociale nga një llogari e dyshimtë. Bëhet fjalë për një profil të shkruar në gjuhën cirilike me emrin “Goran Gogo Frkz”, i cili sipas indikacioneve të para identifikohet si një llogari ruse ose me mbështetje nga Rusia, që ka lënë një mesazh tejet fyes dhe poshtërues në hapësirën e komenteve. Në këtë reagim të papranueshëm thuhet fjalë për fjalë: “Oooo teroristicki kozojebu , jebat cemo ti sve zensko u familiji brzih dana”, që në shqip përkthehet: “Ooo terrorist…, do t’ia q*jmë krejt femrat e familjes tënde brenda pak ditësh”. Përmbajtja e këtij mesazhi shfaq qartë një formë të dhunës kibernetike dhe përbën një paralajmërim të drejtpërdrejtë ndaj sigurisë dhe integritetit të familjes së ish-kryeministrit. Ngjarja ka ndodhur në një periudhë tejet të ndjeshme për skenën politike vendase, sidomos tani kur krahas zhvillimeve që lidhen me proceset në Gjykatën e Hagës, në opinionin publik po diskutohet gjithnjë e më shumë mundësia që Ramush Haradinaj të propozohet për President të vendit. Ky incident reflekton vazhdimësinë e një fushate më të gjerë të sulmeve digjitale që janë drejtuar kohët e fundit ndaj kësaj familjeje. Vlen të kujtohet se vetëm pak javë më parë, vëllai i tij, ish-gjenerali i UÇK-së Daut Haradinaj, bëri publike se ka marrë kërcënime direkte nga ushtarë rusë dhe serbë të pozicionuar në frontin e luftës në Ukrainë. Megjithëse Daut Haradinaj i kishte quajtur ata publikisht “zagarë” që nuk përbëjnë shqetësim për të, rikthimi i këtij skenari kërcënues tashmë ndaj Ramush Haradinaj ngre alarme të reja për sigurinë.