Dënimi politik për zgjedhjet, Salianji dërgon çështjen në Kushtetuese: E kanë zvarritur qëllimisht për të më mbajtur larg garës

Ish-deputeti i Partisë Demokratike, Ervin Salianji, ka ndërmarrë një hap ligjor duke ankimuar në Gjykatën Kushtetuese vendimin për dënimin e tij. Megjithatë, ai ngre akuza të forta se kjo çështje është mbajtur peng dhe është zvarritur me dashje për afro dy vjet, me qëllimin e vetëm për të penguar dërgimin e dosjes në Gjykatën e Strasburgut dhe për ta larguar atë nga proceset zgjedhore. Nëpërmjet një reagimi publik, Salianji shprehet se epilogu i kësaj çështjeje në Gjykatën Kushtetuese është paracaktuar. Ai thekson se vendimet formale shërbejnë vetëm si një fasadë, ndërkohë që verdikti real është vendosur shumë kohë para mbledhjes zyrtare të trupës gjykuese. Salianji e cilëson sërish dënimin e tij si një akt të pastër politik, të motivuar nga angazhimi i jo kundër ligjit, por kundër një regjimi që, sipas tij, synon asgjësimin e opozitës dhe shmangien e tij nga betejat elektorale dhe zgjedhjet vendore. Sipas ish-deputetit, kjo seancë nuk solli asnjë provë të re për integritetin e sistemit të drejtësisë, por konfirmoi se institucionet kyçe vazhdojnë të mbeten të ndikuara nga pazaret politike, duke u shndërruar në vegla në duart e pushtetit. Ai thekson se nuk po kërkon asnjë privilegj apo trajtim të veçantë ligjor, por thjesht zbatuar parimet bazë të një shteti të së drejtës, ku gjykimi është i pavarur, i paanshëm dhe plotësisht i çliruar nga presionet e politikës apo të grupeve të interesit. Në përmbyllje të reagimit të tij, Salianji siguron se as burgu, as presionet dhe as skenaret për ta mbajtur larg garës politike nuk do ta zmbrapsin. Ai rithekson se beteja e tij nuk bëhet për karrige apo mandate, por për të ndërtuar një Shqipëri ku drejtësia nuk u shërben më të fortëve, por mbron qytetarët dhe të drejtën.