Goditje për Real Madridin: Aurelien Tchouaméni lëndohet në grumbullimin me Francën

Kampionët e Spanjës janë në ankth për gjendjen shëndetësore të Aurelien Tchouaménit. Mesfushori francez është detyruar të ndërpresë seancën stërvitore të së martës me kombëtaren e tij, për shkak të një shqetësimi fizik në zonën e ijëve, duke ngritur alarmin si në kampin e Francës ashtu edhe në atë të Real Madridit. Siç raportohet nga mediat prestigjioze në Francë, futbollisti do t’i nënshtrohet testeve mjekësore për të vlerësuar shkallën e dëmtimit. Aktualisht, gjasat janë të mëdha që ai të largohet nga grumbullimi dhe të mos jetë i gatshëm për dy sfidat e ardhshme të Ligës së Kombeve: duelin e së enjtes ndaj Italisë dhe atë të së dielës kundër Turqisë. Situata në përfaqësuesen franceze është bërë edhe më e ndërlikuar, pasi Didier Deschamps është përballur tashmë me tërheqjen e Pierre Kalulus dhe Marcus Thuramit për shkak të problemeve shëndetësore. Kjo vjen pas një periudhe të vështirë për Tchouaménin, i cili kishte munguar edhe në grumbullimet e shtatorit dhe tetorit, pasi stafi teknik kishte vlerësuar se ai nuk ishte në formën optimale fizike pas lëndimit në aduktor që kishte pësuar më herët. Nga ana tjetër, burime pranë Real Madridit kanë konfirmuar se lojtari ndjen dhimbje në ijen e djathtë. Klubi madrilen po monitoron situatën me vëmendje dhe, nëse konstatohet se shqetësimet vazhdojnë, Tchouaméni pritet të rikthehet në kryeqytetin spanjoll që këtë të mërkurë për të nisur rikuperimin nën mbikëqyrjen e mjekëve të klubit.