Goditje për Real Madridin: Aurelien Tchouaméni lëndohet gjatë stërvitjeve me Francën

Kampionët e Spanjës, Real Madrid, kanë marrë një lajm aspak të mirë nga kampi i përfaqësueses së Francës. Mesfushori Aurelien Tchouaméni është detyruar ta ndërpresë para kohe seancën stërvitore të së martës, për shkak të disa problemeve fizike në zonën e ijëve. Sipas mediave franceze, lojtari do t’u nënshtrohet testeve të detajuara mjekësore për të kuptuar seriozitetin e dëmtimit. Aktualisht, nuk përjashtohet mundësia që ai të braktisë grumbullimin e kombëtares dhe të mungojë në dy sfidat e ardhshme të Ligës së Kombeve, ku Franca do të përballet me Italinë në transfertë dhe Turqinë në shtëpi. Situata në kampin francez bëhet edhe më e vështirë, duke marrë parasysh se Pierre Kalulu dhe Marcus Thuram janë larguar tashmë nga ekipi për shkak të problemeve shëndetësore. Kujtojmë se Tchouaméni kishte munguar edhe në grumbullimet e shtatorit dhe tetorit, pasi stafi teknik kishte vlerësuar se ai ende nuk kishte arritur formën optimale pas dëmtimit në aduktor që e kishte përcjellë që nga Kupa e Botës në SHBA. Nga ana tjetër, burime pranë Real Madridit konfirmojnë se shqetësimet e futbollistit janë të përqendruara në ijën e djathtë. Nëse rezultatet e ekzaminimeve nuk do të jenë pozitive, klubi madrilen ka planifikuar rikthimin e menjëhershëm të lojtarit në kryeqytetin spanjoll gjatë ditës së mërkurë për të vazhduar rehabilitimin nën mbikëqyrjen e mjekëve të skuadrës.