Lloga ndaj qeverisë: Mos u mburrni me vendime që ju turpërojnë, shqipja nuk mund të jetë 'gjysmake'

Ish-ministri i Drejtësisë, Krenar Lloga, ka reaguar ashpër pas vendimit të fundit të Qeverisë së Maqedonisë së Veriut për t'iu drejtuar Komisionit të Venecias lidhur me Ligjin për provimin e jurisprudencës. Lloga e ka cilësuar këtë veprim si një prapaktheu të qëllimshme, duke rikujtuar se në janar të vitit 2024, ekzekutivi kishte miratuar një vendim që garantonte zhvillimin e këtij provimi 100% në gjuhën shqipe. Në reagimin e tij, ish-ministri akuzoi shumicën parlamentare, përkatësisht koalicionin VMRO-VLEN të udhëhequr nga Afrim Gashi, se e kanë tërhequr padrejtësisht nga procedura parlamentare nismën e mëparshme, vetëm për të promovuar sot një zgjidhje që ai e konsideron të papranueshme. Sipas Llogës, propozimi i ri qeveritar, i cili parasheh që 70% e provimit të jetë në gjuhën shqipe dhe 30% në atë maqedonase, është një kompromis i dëmshëm. Duke përdorur një shprehje popullore për të ilustruar pakënaqësinë e tij, Lloga u bëri thirrje autoriteteve të mos krenohen me një vendim që, sipas tij, përfaqëson turp politik. “Populli ynë e thotë bukur: ‘Dhia e zgjebur e bishtin përpjetë!’, andaj mos u krenoni me atë që u turpëron”, ka deklaruar ai. Në ndërkohë, Qeveria në mbledhjen e sotme zyrtarizoi kërkesën për një mendim urgjent nga Komisioni i Venecias në lidhje me këtë model të ri. Ky zhvillim vjen pas takimit të ministrit aktual të Drejtësisë, Jeton Shasivari, me përfaqësuesit e studentëve, ku u prezantua drafti që ndan provimin në pjesën teorike në gjuhën shqipe dhe pjesën praktike në gjuhën maqedonase.