Pas bujës së shprehjes “Uki”, Doresa thyen heshtjen: Si e priti ajo kthimin në meme dhe sfidat me gjuhën shqipe

Influencerja e njohur, Doresa, është kthyer në një ndër personazhet më të komentuara në rrjetet sociale, pas një deklarate që u bë virale gjatë përballjes së saj me Jonën, banoren e Big Brother VIP Kosova. Pyetja drejtuar kësaj të fundit, “A e njeh Ukin?”, shkaktoi një valë reagimesh dhe u shndërrua brenda pak kohësh në një meme mjaft të përhapur në internet. Në një sesion pyetje-përgjigjesh të hapur në Instagram, ndjekësit nuk e kanë lënë rastin t’i shpëtojë, duke e pyetur vazhdimisht Doresën për këtë shprehje. Duke iu përgjigjur me humor dhe sportivitet njërit prej ndjekësve, ajo pohoi se e njeh personin në fjalë “shumë, shumë mirë”, duke e shoqëruar komentin e saj me një emoji duke qeshur. Duke qenë se kjo pyetje u përsërit shpesh, Doresa vendosi të sqarojë edhe vështirësitë e saj me gjuhën shqipe, duke theksuar se është rritur në Gjermani dhe se vizitën e parë në Kosovë e ka bërë në moshën shtatëvjeçare. Ajo shpjegoi se angazhimi i madh i prindërve të saj për t’u kujdesur për pesë fëmijë bëri që gjuha shqipe të mos ishte prioritet në shtëpi. “Nuk kam ndjekur kurrë shkollë shqipe si shoqet e mia. Shqipen e kam mësuar kryesisht gjatë martesës dhe më pas duke komunikuar me ndjekësit e mi në rrjetet sociale”, rrëfeu ajo, duke reflektuar mbi rrugëtimin e saj gjuhësor. Përballë kësaj situate, Doresa ka treguar një qasje mjaft pozitive. Ajo shprehet se tashmë edhe vetë e sheh me humor situatën dhe ndihet e kënaqur që është bërë pjesë e kulturës së memeve në internet. “Jam shumë krenare që jam kthyer në meme. Dalëngadalë kam filluar të qesh edhe unë me këtë gjë dhe më duket vërtet cool”, përfundoi ajo.