Kërcënim i rëndë ndaj Ramush Haradinajt: Llogaria me bazë ruse vë në shënjestër familjen e tij

Një profil i dyshimtë në rrjetet sociale ka lëshuar një kërcënim publik dhe me përmbajtje fyese në faqen zyrtare të ish-kryetarit të AAK-së, Ramush Haradinaj. Bëhet fjalë për një llogari që përdor alfabetin cirilik nën emrin “Goran Gogo Frkz”, e cila nga të dhënat e para identifikohet si profil rus ose me mbështetje ruse, ku është shkruar një koment tejet degradues. Në mesazhin e publikuar thuhet tekstualisht: “Oooo teroristicki kozojebu , jebat cemo ti sve zensko u familiji brzih dana”, çka në shqip përkthehet: “Ooo terrorist…, do t’ia q*jmë krejt femrat e familjes tënde brenda pak ditësh”. Përdorimi i kësaj gjuhe përbën një akt të qartë të agresionit kibernetik dhe një paralajmërim direkt kundër sigurisë dhe integritetit të familjes së ish-kryeministrit. Ky zhvillim ndodh në një periudhë mjaft të ndjeshme për skenën politike në vend, sidomos kur krahas zhvillimeve rreth proceseve në Gjykatën e Hagës, në opinionin publik po diskutohet gjithnjë e më shumë mundësia e propozimit të Ramush Haradinajt për President të Republikës. Ngjarja në fjalë pason një varg sulmesh dhe fushatash digjitale të drejtuara ndaj kësaj familjeje. Vetëm pak javë më parë, vëllai i tij, ish-gjenerali i UÇK-së Daut Haradinaj, bëri publike se ka marrë kërcënime direkte nga ushtarë rusë dhe serbë që luftojnë në frontin e Ukrainës. Megjithëse Daut Haradinaj i kishte cilësuar ata hapur si “zagarë” që nuk përbëjnë shqetësim për të, rishfaqja e kërcënimeve të ngjashme tashmë ndaj Ramush Haradinajt ngre kambanat e alarmit për një rrezik të përsëritur.