Manchester United drejt ndryshimit historik: Familja Glazer hap dyert për shitjen e klubit

E ardhmja e Manchester United duket se po kalon në një fazë vendimtare, një moment që tifozët e kanë kërkuar prej kohësh. Pakënaqësia e mbështetësve, e manifestuar përmes protestave të ndryshme, siç ishte rasti i hedhjes së topave të tenisit në fushë gjatë ndeshjes kundër Romës në Ligën e Kampionëve, duket se ka dhënë efektin e saj. Pas dy dekadash në krye të klubit, që nga viti 2005, familja Glazer mësohet se ka ndryshuar qëndrim dhe është e gatshme të shqyrtojë ofertat për shitjen e Manchester United. Megjithatë, ky proces është i kushtëzuar nga një kërkesë e qartë financiare: familja amerikane nuk do të ndërmarrë asnjë hap nëse nuk plotësohet vlerësimi i tyre për klubin. Sipas Stefan Borson, një ekspert i shquar i financave në futboll, familja Glazer ka nisur tashmë procesin e kërkimit të një blerësi të përshtatshëm. Në një prononcim për mediat angleze, Borson deklaroi se ka marrë informacione nga një burim i besueshëm brenda industrisë së futbollit, i cili konfirmon se klubi është zyrtarisht në treg. Ai shpjegoi se mungesa e një njoftimi publik mund të jetë një strategji për të shmangur komplikimet e ngjashme me procesin e vitit 2022, kur Sir Jim Ratcliffe bleu vetëm një pjesë të aksioneve. Sa i përket çmimit të kërkuar, eksperti thekson se shifra që familja Glazer synon të arrijë sillet rreth 5 miliardë paund. Ata mbeten të palëkundur në pozicionin e tyre: shitja do të finalizohet vetëm nëse oferta përputhet me pritshmëritë e tyre ekonomike. Strategjia e pronarëve amerikanë bazohet në fuqinë e jashtëzakonshme komerciale të markës Manchester United. Sipas Borson, familja Glazer është e bindur se klubi mbetet një makineri fitimprurëse pavarësisht performancës në fushën e blertë. Për ta, vlera e marketingut dhe të ardhurat që gjeneron klubi tejkalojnë nevojën për rezultate sportive të menjëhershme, duke e bërë United një aset tejet të vlefshëm në treg.