Alarm në Barcelonë: Klubi katalunas kërkon menaxhimin e kujdesshëm të Raphinhas në Brazil

Raphinha ka zbritur tashmë në Singapor, ku së bashku me kombëtaren e Brazilit do të zhvillojë dy takime miqësore, fillimisht kundër Japonisë këtë të shtunë dhe më pas më 17 nëntor. Megjithatë, kjo vizitë e sulmuesit ka ngritur alarmin te Barcelona, e cila i ka kërkuar zyrtarisht Federatës Braziliane të Futbollit (CBF) që të tregohet tejet e kujdesshme me ngarkesën fizike të lojtarit. Ky grumbullim përfaqëson një sfilitje të vërtetë për anësorin, i cili pritet të përshkojë rreth 22 mijë kilometra, duke shtuar kështu lodhjen e akumuluar nga udhëtimi i gjatë i muajit të kaluar drejt Australisë. Barcelona është vënë në lëvizje për të koordinuar aktivizimin e tij me stafin teknik të Brazilit, me synimin e qartë për të shmangur çdo rrezik të panevojshëm lëndimi për yllin e tyre. Duke qenë se bëhet fjalë për ndeshje miqësore, pritet që stafi teknik i Brazilit të tregojë kujdesin e duhur. Raphinha po kalon një formë jetësore, duke qenë golashënuesi më i mirë i skuadrës me 19 gola këtë sezon, nga të cilët 15 në La Liga. Mediumi brazilian 'Globo Esporte' konfirmon se palët janë në komunikim të vazhdueshëm për të siguruar që lojtari të rikthehet në Spanjë në gjendje optimale, duke minimizuar gjasat për një dëmtim të tretë radhazi gjatë angazhimeve ndërkombëtare. Shqetësimi i katalunasve buron nga historia e fundit e problemeve fizike të brazilianit. Në mars, ai u dëmtua në ndeshjen kundër Francës, çka e detyroi të mungonte në çerekfinalen e Ligës së Kampionëve kundër Atletico Madridit. Po ashtu, në tetor, Raphinha u kthye më herët nga grumbullimi në Australi për shkak të një edeme në kofshën e djathtë, që e la jashtë fushave për sfidat ndaj Getafes dhe Galatasarayt. Fakti që dëmtimet kanë prekur vazhdimisht të njëjtën zonë ka ndezur dritën e kuqe në zyrat e klubit. Trajneri Hansi Flick e ka bërë të qartë qëndrimin e tij edhe publikisht. Pas ndeshjes së fundit në stadiumin 'Metropolitano', tekniku gjerman deklaroi se do të ishte i lumtur nëse minutazhi i Raphinhas do të menaxhohej në mënyrë racionale gjatë kësaj periudhe me përfaqësuesen e tij, duke pasur parasysh rëndësinë jetike që lojtari ka për objektivat e Barcelonës.