MPJD sqaron vizitën e përfaqësuesve të 'Listës Studentore': Ja si hynë ata në Kosovë

Ministria e Punëve të Jashtme dhe Diasporës (MPJD) ka reaguar lidhur me qëndrimin e përfaqësuesve të të ashtuquajturës 'Listë Studentore' nga Serbia në territorin e Republikës së Kosovës gjatë datave 8 dhe 9 nëntor 2026. Institucioni ka sqaruar se nuk ka pasur asnjë kërkesë zyrtare për leje vizite nga ky grupim. Në një përgjigje zyrtare, MPJD thekson se nuk është pranuar asnjë aplikacion për vizitë zyrtare, e për pasojë nuk është lëshuar asnjë miratim për një vizitë të tillë. Sipas procedurave në fuqi, kërkesat për vizita zyrtare nga përfaqësuesit e institucioneve të Serbisë duhet të procedohen obligativisht përmes Zyrës Ndërlidhëse të Republikës së Kosovës në Serbi. Megjithatë, Ministria ka sqaruar se personat në fjalë, duke qenë se nuk ushtrojnë ende funksione zyrtare brenda institucioneve shtetërore të Serbisë, kanë hyrë në Kosovë në cilësinë e qytetarëve të thjeshtë. Si rrjedhojë, qëndrimi i tyre është trajtuar në përputhje me rregullat e përgjithshme për hyrjen dhe lëvizjen e shtetasve serbë në territorin e Kosovës, për të cilat nuk kërkohet autorizim paraprak nga MPJD-ja.