MPJD sqaron vizitën e 'Listës Studentore': Hynë në Kosovë si qytetarë privatë, jo si zyrtarë

Ministria e Punëve të Jashtme dhe Diasporës (MPJD) ka sqaruar statusin e vizitës së përfaqësuesve të të ashtuquajturës 'Listë Studentore' nga Serbia, të cilët qëndruan në Kosovë gjatë datave 8 dhe 9 nëntor 2026. Në një përgjigje zyrtare, dikasteri i jashtëm ka bërë të ditur se nuk ka pranuar asnjë kërkesë për vizitë zyrtare nga ky grupim, e rrjedhimisht nuk është lëshuar asnjë leje apo miratim për një aktivitet të këtij karakteri. Sipas procedurave standarde, kërkesat për vizita zyrtare të përfaqësuesve të institucioneve serbe duhet të kanalizohen përmes Zyrës Ndërlidhëse të Republikës së Kosovës në Serbi, proces i cili në këtë rast nuk është ndjekur. Duke qenë se personat në fjalë ende nuk ushtrojnë funksione zyrtare në institucionet shtetërore të Serbisë, MPJD-ja ka sqaruar se hyrja dhe qëndrimi i tyre në territorin e Kosovës është trajtuar njëjtë si për çdo qytetar tjetër. Ata kanë shfrytëzuar rregullat e përgjithshme për lëvizjen e shtetasve të Serbisë, për të cilat nuk kërkohet autorizim paraprak nga autoritetet diplomatike të Kosovës.