Vizita e Listës Studentore në Kosovë, MPJD sqaron statusin e tyre: Nuk kërkuan leje zyrtare

Vizita e fundit e përfaqësuesve të Listës Studentore nga Serbia në territorin e Republikës së Kosovës ka ngjallur reagime të shumta në opinionin publik, duke shtruar pyetje mbi procedurat e lejuara për hyrjen e tyre në vend. Në një përgjigje zyrtare për portalin tonë, Ministria e Punëve të Jashtme dhe Diasporës (MPJD) ka sqaruar se nuk ka pranuar asnjë kërkesë zyrtare për vizitë nga ana e këtij subjekti politik, i cili aktualisht është në proces të marrjes së pushtetit në Serbi. Institucioni ka sqaruar se, meqenëse vizitorët në fjalë nuk ushtrojnë ende funksione shtetërore në Serbi, ata janë trajtuar si qytetarë të thjeshtë. Rrjedhimisht, hyrja dhe qëndrimi i tyre në Kosovë është realizuar në përputhje me procedurat standarde që vlejnë për të gjithë shtetasit serbë, për të cilat nuk kërkohet një miratim i veçantë paraprak nga ana e MPJD-së. Gjatë qëndrimit të tij në Kosovë, Fegja Dimoviq, kandidat i Listës Studentore, theksoi rëndësinë që ka Kosova në programin e tyre politik. Ai e cilësoi vendin si një “pjesë përbërëse të Serbisë” dhe një “shtyllë të identitetit shpirtëror dhe kulturor” të tyre. Programi i vizitës së delegacionit nga Beogradi ka përfshirë ndalesa në Manastirin e Graçanicës dhe atë të Deçanit. Këto objekte fetare, të cilat janë nën administrimin e Dioqezës së Rashkës dhe Prizrenit të Kishës Ortodokse Serbe, kanë qenë pikat kryesore të itinerarit të tyre gjatë kësaj vizite.