De la Fuente qetëson Barcelonën për Lamine Yamalin

Trajneri i kombëtares së Spanjës, Luis de la Fuente, ka dhënë lajme qetësuese për gjendjen fizike të Lamine Yamal. Sulmuesi i Barcelonës nuk do të luajë në ndeshjen e së enjtes kundër Republikës Çeke, por pritet të jetë i gatshëm për përballjen me Anglinë të dielën, në stadiumin “Metropolitano”. Yamal ka shqetësime në gjurin e djathtë, të cilat nuk janë serioze, por stafi teknik ka vendosur të mos rrezikojë me aktivizimin e tij. Sipas De la Fuentes, futbollisti mund të luante edhe kundër çekëve, por nuk kishte arsye të merrej një rrezik i panevojshëm, duke pasur parasysh rëndësinë e ndeshjes së fundit në fazën e grupeve të Ligës së Kombeve. “Ky ishte vendimi i duhur. Me siguri ai ishte i gatshëm të luante dhe, nëse do të kishim pasur një urgjencë, do të kishim vendosur ta aktivizonim. Por nuk ia vlente të merrnim asnjë rrezik. Në radhë të parë mendojmë për shëndetin e tij dhe më pas duam që të jetë në gjendje perfekte për të dielën”, deklaroi trajneri në një intervistë për agjencinë EFE. Tekniku spanjoll shpjegoi se shqetësimi fizik i Yamalit daton nga ndeshja e fundit e Champions League kundër Aston Villas, më 3 nëntor, në “Camp Nou”. Ai pësoi një inflamacion të lehtë, që nuk e lejonte të ishte në gjendjen e tij më të mirë. Për këtë arsye, sulmuesi ka qëndruar në Barcelonë dhe do t’i bashkohet grumbullimit të Spanjës në Las Rozas të enjten në mbrëmje ose të premten në mëngjes. Kjo do t’i japë mundësinë të zhvillojë dy seanca stërvitore përpara sfidës me Anglinë. De la Fuente foli edhe për situatën e Mikel Oyarzabalit. Sulmuesi i Real Sociedad po rikuperohet nga gripi, ndërsa njëkohësisht pret lindjen e fëmijës së tij të dytë. Bashkimi i tij me kombëtaren do të varet nga mënyra se si do të shkojë lindja. Ndërkohë, trajneri konfirmoi se Martin Zubimendi nuk do të ketë probleme për të luajtur me maskë mbrojtëse, pas frakturës së hundës që pësoi me Arsenalin. Mesfushori mund të jetë një alternativë për të zëvendësuar Rodri Hernandezin, nëse ky i fundit nuk do të jetë i gatshëm. Në stërvitjen e së martës morën pjesë normalisht edhe Victor Muñoz, i thirrur për shkak të mungesave të përkohshme të Yamalit dhe Oyarzabalit, si dhe portieri David Raya, i cili kishte marrë leje për të përmbushur disa angazhime personale në Londër.