Sekretari amerikan i Mbrojtjes, Pete Hegseth, përmend ndërhyrjen në Kosovë për të mbrojtur legjitimitetin e operacioneve ushtarake

Sekretari i Mbrojtjes së Shteteve të Bashkuara, Pete Hegseth, ka përfshirë edhe Kosovën në një argumentim të tij për të mbrojtur ligjshmërinë e operacioneve ushtarake amerikane në Iran, duke u përballur kështu me iniciativën për shkarkimin e tij nga detyra, e njohur si procedurë e “impeachment”-it. Gjatë një konference për media, Hegseth e ka përdorur shembullin e intervenimit të NATO-s në Kosovë në vitin 1999, nën administratën e Bill Clintonit, si dëshmi për të treguar se operacionet ushtarake të mëparshme nuk kanë rezultuar me shkarkimin e sekretarëve të Mbrojtjes. Ai nënvizoi se përgjatë 250 viteve të historisë amerikane, asnjë zyrtar i këtij niveli nuk është përballur me shkarkim për kryerjen e operacioneve të tilla. “Historia është e qartë. As gjatë Reaganit në Liban, as gjatë Clintonit në Kosovë, as nën Obamën apo Bidenin në Irak e Siri, nuk është ndjekur një praktikë e tillë. Ky është standardi ynë”, deklaroi ndër të tjera Hegseth. Ai e cilësoi lëvizjen e kongresistit Thomas Massie si një përpjekje të motivuar nga mospajtimet politike, duke mohuar se bëhet fjalë për krime të rënda, tradhti apo shkelje të parashikuara nga themeluesit e SHBA-së për shkarkim. Nisma për shkarkimin e Hegseth vjen nga kongresisti republikan Thomas Massie, i cili ka ngritur tetë pika akuze. Këto pretendime lidhen kryesisht me angazhimin ushtarak amerikan në Iran, Jemen dhe Venezuelë pa autorizimin paraprak të Kongresit. Massie akuzon sekretarin për shkelje të Kushtetutës dhe zbatim të urdhrave të paligjshëm, akuza të cilat Hegseth i ka hedhur poshtë kategorikisht, duke i cilësuar si të pabaza dhe me sfond politik.