Humbje e rëndë në botën e hipizmit: Ndahet nga jeta 22-vjeçarja pas aksidentit tragjik në pistë

Një ngjarje e rëndë ka tronditur komunitetin sportiv në Australi, pas ndarjes nga jeta të kalorëses 22-vjeçare, Izzy Neale. Sportistja e re nuk ka mundur t'u mbijetojë plagëve të marra gjatë një gare të zhvilluar të dielën, më 8 nëntor, në hipodromin Warren, të vendosur në shtetin e Uellsit të Ri Jugor. Lajmin për humbjen e saj e ka bërë të ditur familja e të ndjerës përmes një njoftimi zyrtar të shpërndarë nga organizata Racing NSW. Aksidenti fatal ndodhi gjatë garës së njohur 'Warren Shire Cotton Cup', një garë prej 1600 metrash, ku Neale ishte duke garuar me kalin e saj, Marnoo. Fatkeqësisht, vetëm 400 metra përpara vijës së finishit, ajo u rrëzua nga kali në rrethana ende të paqarta. Goditja e fuqishme i shkaktoi 22-vjeçares lëndime të rënda në kokë, duke bërë që ajo të humbasë menjëherë vetëdijen. Ekipet mjekësore ndërhynë me shpejtësi në pistë për t'i dhënë ndihmën e parë, përpara se ajo të transportohej me helikopter drejt spitalit të Dubbo-s. Në spital, Neale u shtrua në gjendje tejet kritike për jetën, duke u mbajtur në aparatura të specializuara. Pavarësisht përpjekjeve titanike të personelit mjekësor, e reja ndërroi jetë të martën, duke mbyllur sytë përgjithmonë e rrethuar nga dashuria e familjarëve dhe miqve të saj më të ngushtë.