E ardhmja e Endrick në pikëpyetje: Talenti brazilian nuk përjashton huazimin te Roma apo Milani

Pozicioni i Endrick te Real Madridi është shndërruar në një temë diskutimi mjaft të ndjeshme teksa merkatoja e janarit po afron. Sulmuesi i talentuar brazilian, i cili iu bashkua madrilenëve me një bujë të madhe pas formës së shkëlqyer te Palmeiras, kërkon më shumë minuta në fushë. Në këtë kontekst, lojtari ka lënë të hapur çdo mundësi, duke përfshirë këtu edhe një transferim të mundshëm te gjigantët italianë, Roma ose Milani. “Jam ende 20 vjeç dhe situata është në zhvillim. Prioriteti im është të luaj, të ndihem i lumtur dhe të jem në shërbim të skuadrës. Nuk kam një përgjigje për atë që do të ndodhë në janar, gjithçka ia lë në dorë Zotit. Kërkoj më të mirën për zhvillimin tim profesional dhe do të vazhdoj të punoj me përulësi, duke dhënë maksimumin në çdo stërvitje”, u shpreh sulmuesi gjatë grumbullimit me kombëtaren e Brazilit. Ndër të tjera, Endrick nuk e fshehu raportin e ngushtë që gëzon me trajnerin José Mourinho. “Kam një besim të jashtëzakonshëm te Mourinho. Ai më kontakton çdo ditë, jo vetëm për çështje futbollistike, por për t’u interesuar për mirëqenien time personale. Pavarësisht zërave, fokusi im mbetet te Real Madridi, pasi interesat e klubit janë mbi çdo dëshirë individuale”, shtoi ai. Në mbyllje, ylli brazilian zbuloi edhe një synim madhor për të ardhmen: “Objektivi im është të kem arritur kulmin e karrierës në vitin 2030 për t’i shërbyer Brazilit. Të gjithë ne kemi ëndrrën e përbashkët për ta kthyer Kupën e Botës në shtëpi.”