Bilanc tragjik në sektorin energjetik: 10 elektricistë të vdekur për 10 muaj, deputetja Koçeku kërkon hetime dhe mbështetje për familjet

Deputetja e pavarur, Marjana Koçeku, ka reaguar ashpër pas ndarjes nga jeta të elektricistit 34-vjeçar, Angjelin Nika, ngjarje kjo e shënuar në qytetin e Shkodrës. Në reagimin e saj, Koçeku bën me dije se brenda dhjetë muajve të fundit janë shaguar dhjetë jetë punonjësish të energjisë gjatë orarit të punës, duke e quajtur këtë statistikë një tragjedi kombëtare. Ajo ka vënë theksin te rrezikshmëria e lartë dhe kushtet e papranueshme në të cilat operojnë punonjësit, ndërkohë që ka kërkuar masa të menjëhershme nga autoritetet kompetente, përfshirë sigurime të detyrueshme, kompensime dhe ndihmë financiare afatgjatë për familjet e prekura. Sipas fjalëve të saj, humbja e një elektricisti çdo muaj krijon një situatë të ngjashme me një zonë lufte. Ajo përmendi se rrjeti elektrik është i amortizuar, infrastruktura është e degraduar, ndërsa ndërhyrjet shpesh kryhen në kushte ekstreme dhe tejet të rrezikshme për jetën. Edhe pse pranon se modernizimi i rrjetit kërkon kohë, deputetja thekson se në mungesë të kushteve minimale të sigurisë, shteti ka detyrimin urgjent të krijojë një skemë të posaçme sigurimi dhe kompensimi për sektorin energjetik, duke siguruar mbështetje për fëmijët dhe familjarët që humbin mbështetësin e tyre. Në përfundim, ajo nënvizon se prioriteti kryesor i shtetit duhet të jetë garantimi i kthimit të shëndoshë të punonjësve në vatrat e tyre familjare, por në rastet kur ndodhin fatkeqësi në detyrë, institucionet kanë përgjegjësinë morale dhe ligjore t'i qëndrojnë pranë familjeve edhe pas përfundimit të periudhës së zisë, për t'i ndihmuar të përballojnë sfidat e përditshmërisë.