Vlerësim nga UEFA: Arbitrja shqiptare Emanuela Rusta do të gjykojë supersfidën Juventus-Lyon në Champions League

Skena e futbollit europian për femra kthehet sërish në qendër të vëmendjes këtë mesjavë, teksa në kuadër të xhiros së katërt të fazës së grupeve në UEFA Women’s Champions League, Juventusi do të presë në shtëpi gjigantët e Lyonit. Ndeshja e rëndësishme është planifikuar të zhvillohet mbrëmjen e nesërme, duke nisur nga ora 21:00. Në një vlerësim të lartë për arbitrimin shqiptar, UEFA i ka besuar drejtimin e këtij dueli elitar gjyqtares së njohur të Superiores, Emanuela Rusta. Ajo do të jetë arbitrja kryesore që do të vendosë drejtësinë në fushën e lojës, duke konfirmuar rritjen e besimit të institucionit më të lartë të futbollit kontinental ndaj saj. Përballja pritet të jetë mjaft impenjative, duke marrë parasysh peshën e ekipeve. Nga njëra anë, Juventusi përfaqëson një traditë të konsoliduar në futbollin italian, ndërsa nga ana tjetër, Olympique Lyonnais vjen me statusin e “rekordmenit” absolut, pasi e ka fituar këtë kompeticion prestigjioz plot tetë herë në historinë e tij.