KDI alarmon: Deputetët po pengojnë llogaridhënien e Autoritetit të Konkurrencës

Instituti Demokratik i Kosovës (KDI) ka ngritur shqetësime serioze lidhur me dështimin e vazhdueshëm të Autoritetit të Konkurrencës për të raportuar para Komisionit për Ekonomi, Industri, Ndërmarrësi, Tregti dhe Inovacion. Sipas këtij instituti, kjo qasje po dëmton rëndë procesin e mbikëqyrjes parlamentare, sidomos në një periudhë kur ka dyshime për paralizë të punës në organin kolegjial të këtij autoriteti që nga prilli i vitit 2025. Saga e dështimeve për raportim u evidentua në mbledhjen e 20 tetorit, ku kryetarja e Autoritetit, Neime Binaku-Isufi, ishte planifikuar të raportonte më 27 tetor, por vizita u anulua për shkak të pamundësisë së saj për të marrë pjesë. Më pas, as takimi i planifikuar për 3 nëntor nuk u realizua, pasi mungesa e deputetëve të Lëvizjes Vetëvendosje bëri që komisioni të mos kishte kuorumin e nevojshëm për të vazhduar punën. Në seancën e 10 nëntorit, situata u komplikua edhe më tej. Ndonëse dy anëtare të Autoritetit të Konkurrencës ishin të pranishme, mungesa e kryetares Binaku-Isufi nxiti deputetët e shumicës parlamentare që të kërkojnë heqjen ose shtyrjen e kësaj pike nga rendi i ditës, një kërkesë kjo që u kundërshtua nga opozita. KDI vlerëson se mungesa e kryetares dhe manovrat e deputetëve për të shmangur raportimin përbëjnë një goditje ndaj transparencës dhe përgjegjshmërisë publike. Instituti thekson se obligimi i deputetëve për të kërkuar llogari është i garantuar me Kushtetutën e Republikës së Kosovës, konkretisht me nenin 65, paragrafin 9, i cili e ngarkon Kuvendin me mbikëqyrjen e institucioneve publike. Duke pasur parasysh rëndësinë e kësaj çështjeje, KDI u ka bërë thirrje ligjvënësve që të lënë mënjanë agjendat politike dhe të fokusohen në përmbushjen e detyrave të tyre kushtetuese. Njëkohësisht, është kërkuar nga Komisioni për Ekonomi që sa më shpejt ta rikthejë në rend dite raportimin e Autoritetit të Konkurrencës, në mënyrë që të adresohen të gjitha shqetësimet e ngritura për funksionimin e këtij institucioni.