Kriza sociale në Francë: Kryeministri paralajmëron rritje të pagës minimale për të qetësuar protestat

Kryeministri francez, Sebastien Lecornu, ka bërë të ditur planet për një rritje të parakohshme të pagës minimale, e cila pritet të zbatohet në muajin dhjetor e jo në janar, si pjesë e përpjekjeve për të ulur tensionet e krijuara nga kriza e kostos së jetesës, e cila ka sjellë disa nga trazirat më të rënda civile në vend gjatë viteve të fundit. Ekzekutivi francez është përballur me një valë demonstratash përgjatë javëve të fundit. Ndonëse nisja e tyre u shkaktua nga gjendja e pafinancuar e shkollave, pakënaqësitë janë zgjeruar ndjeshëm, duke kulmuar me përleshjet në qytetet kryesore më 17 tetor, të cilat i zunë në befasi strukturat e sigurisë. Në një konferencë për media, Ministri i Punës, Jean-Pierre Farandou, sqaroi se ndryshe nga praktika e zakonshme ku paga minimale kombëtare përshtatet çdo 1 janar për shkak të inflacionit, kësaj radhe qeveria ka vendosur që rritja me 1.6% të ndodhë që në dhjetor. Ky ndryshim do ta ngrejë pagën minimale mujore netove në 1,502 euro, duke shënuar një shtesë prej 24 eurosh krahasuar me nivelin aktual. Paga e fundit ishte rritur në qershor me 35 euro për shkak të rritjes së inflacionit. Autoritetet po ndjehen të shqetësuara nga përshkallëzimi i pakënaqësisë sociale, veçanërisht kur po afrohen pesë muaj nga zgjedhjet presidenciale, ku udhëheqësja e ekstremit të djathtë, Marine Le Pen, udhëheq në sondazhe. Masa e ndërmarrë nga qeveria nuk ka arritur të përmbushë pritshmëritë e sindikatave. CFDT, sindikata më e madhe në vend, kishte kërkuar një rritje prej 100 eurosh, ndërsa ajo e krahut të majtë, CGT, kërkonte një rritje prej 10%, e cila përkthehet në rreth 150 euro në muaj. Pas takimit të mbajtur, drejtuesja e CFDT-së, Marylise Leon, e cilësoi rritjen si “të pamjaftueshme”, ndërkohë që homologja e saj e CGT-së, Sophie Binet, u shpreh se kjo masë përbën vetëm “thërrime”. Edhe pse qeveria kërkon me çdo kusht të qetësojë opinionin publik, ajo ka hapësirë mjaft të kufizuar veprimi për shkak të ngarkesës në rritje të borxhit shtetëror. Vala e protestave nisi në shtator fillimisht në shkollat e mesme, por shumë shpejt u shndërrua në një revoltë më të gjerë kundër kostove të larta të jetesës, gjendjes së shërbimeve publike dhe bllokimit politik. Trazirat vijnë në një periudhë kyçe, vetëm pesë muaj para zgjedhjeve presidenciale franceze. Sondazhet aktuale parashikojnë një balotazh të mundshëm mes kandidates së ekstremit të djathtë, Marine Le Pen, dhe rivalit të saj të majtë, Jean-Luc Melenchon. Nga ana tjetër, Presidenti francez Emmanuel Macron, mandati i dytë i të cilit po shkon drejt fundit dhe i cili po përballet me rënie drastike të mbështetjes popullore në sondazhe, nuk ka të drejtë të kandidojë sërish për këtë post.