Kurti nga Parisi: Stabiliteti nuk duhet të arrihet në kurriz të demokracisë dhe zhvillimit

Kryeministri i Republikës së Kosovës, Albin Kurti, ka marrë pjesë në Forumin e Paqes në Paris, ku u bë parte e panelit të diskutimit “Making Peace Last: Rebuilding Societies After War”, krahas Guvernatorit të Bankës për Zhvillim të Këshillit të Evropës, Carlo Monticelli. Gjatë fjalës së tij hapëse, kreu i ekzekutivit kosovar u ndal te pesha e madhe që kanë demokracia dhe përparimi ekonomik e shoqëror, duke vënë në pah se këto shtylla nuk duhet të kompromentohen kurrë në emër të ruajtjes së stabilitetit. Duke vlerësuar se qytetarët duhet të jenë gjithmonë përfituesit kryesorë të proceseve, ai e cilësoi infrastrukturën si një bazë të rëndësishme për zhvillim, ndërkohë që veçoi edhe domosdoshmërinë e një sistemi arsimor cilësor. Në aspektin ekonomik, Kurti bëri të ditur se rritja e Bruto Produktit Vendor (BPV) ka shënuar shifra pozitive, duke arritur në 5.4% gjatë tremujorit të parë dhe 4.1% në të dytin, teksa ritmi nuk ka rënë asnjëherë nën 4%. Për më tepër, ai theksoi se arsimi dhe ekonomia duhet të ecin paralelisht për një shoqëri të shëndoshë, duke përmendur gjithashtu ngushtimin e hendekut të pagave nga raporti 20 me 1 që ishte dikur, në 4 me 1 në periudhën aktuale qeverisëse.