Çështja “Sterilizimi”: Ish-ministri Ilir Beqaj paraqitet në GJKKO

Ish-ministri i Shëndetësisë, Ilir Beqaj, është paraqitur këtë të enjte në Gjykatën e Posaçme kundër Korrupsionit dhe Krimit të Organizuar (GJKKO), ndërkohë që vijon procesi gjyqësor ndaj tij lidhur me koncesionin e njohur si dosja “Sterilizimi”. Kujtojmë se ish-anëtari i kabinetit qeveritar po përballet në këtë gjykatë me akuzat zyrtare për shpërdorim detyre me pasojë vjedhjen, si dhe për veprën penale të grupit të strukturuar kriminal. Ndërkohë, tetë të pandehurit e tjerë të përfshirë në këtë dosje, ku bëjnë pjesë ish-zv/ministri Klodian Rjepaj dhe sipërmarrësi fitues i koncesionit, Ilir Rrapaj, kanë mbyllur llogaritë me drejtësinë përmes një gjykimi të shkurtuar në një proces më vete. Gjatë këtij gjykimi, togat e zeza rrëzuan akuzën e grupit të strukturuar kriminal për Rjepajn dhe Rrapajn. Për sa i përket masës së sigurisë, Beqaj ndodhet aktualisht nën arrest shtëpie për çështjen e njohur si “SASPAC”. Ky ndryshim i masës erdhi pasi kishin skaduar afatet ligjore të paraburgimit për dosjet që ndodhen ende në fazë hetimore, vendim ky që solli edhe largimin e tij nga qelia.