Drejtësi e vonuar për Diana Kastratin: Pas 15 vjetësh nis gjykimi, babai i viktimës zotohet se nuk do të ndalet kurrë

Pas një pritjeje të gjatë prej një dekade e gjysmë, ka nisur procesi gjyqësor për vrasjen e 27-vjeçares Diana Kastrati. Avokatja e familjes, Miranda Haxhiu, dhe babai i së ndjerës, Gëzim Kastrati, kanë dalë me kërkesa të qarta për zbardhjen e plotë të këtij krimi të rëndë dhe vënien e drejtësisë në vend, gjatë një prononcimi dhënë pas seancës së mbajtur në Gjykatën Themelore në Prishtinë. Duke e cilësuar këtë zhvillim si një proces tejet të vonuar, avokatja Haxhiu theksoi se ekipet ligjore do të ndjekin me vëmendje çdo fazë të procedurës. Ajo gjithashtu bëri thirrje që organet e drejtësisë në Republikën e Kosovës të angazhohen për të siguruar praninë e të pandehurit Adnan Jashari në këtë gjykim, i cili aktualisht po zhvillohet në mungesë. Sipas saj, kjo ngjarje tragjike ka lënë plagë të thella jo vetëm te familja Kastrati, por te e gjithë shoqëria, në një kohë kur rastet e dhunës ndaj grave në vend po shënojnë rritje. Në rrafshin emocional dhe njerëzor, babai i viktimës, Gëzim Kastrati, u shpreh se këto 15 vjet kanë qenë një kalvar i vërtetë vuajtjesh për të gjithë familjarët dhe rrethin e tyre. Ai shfaqi shpresën se ky epilog gjyqësor do të japë përgjigjet e merituara për gjithë këtë mundim të gjatë, duke kërkuar llogaridhënie nga të gjithë ata që kontribuan në zvarritjen e rastit. Më tej, Kastrati u ndal edhe te dukuria e vrasjeve të grave në vend, duke potencuar se shkak kryesor i këtyre tragjedive mbetet neglizhenca e zyrtarëve përgjegjës institucionalë. Ai kujtoi përpjekjet e tij të pandërprera qysh nga viti 2011 për të ngritur alarmin, duke shtuar se edhe sot e kësaj dite, familja nuk do të ndalet së kërkuari drejtësi deri në fund.