Roberto Mancini shpreh besimin: Italia mund të kualifikohet në gjysmëfinalet e Ligës së Kombeve

Kombëtarja italiane e futbollit po përgatitet për dy sfida vendimtare në Ligën e Kombeve, ku do të përballet me Francën më 12 nëntor në stadiumin “San Siro” dhe tri ditë më vonë, më 15 nëntor, do të udhëtojë drejt Brukselit për ndeshjen kundër Belgjikës. Për këtë fazë, trajneri i “Axurrëve”, Roberto Mancini, ka si objektiv parësor ruajtjen e pozicionit të dytë në Grupin A dhe sigurimin e kalimit në fazën finale të turneut. Në një prononcim nga qendra stërvitore në Coverciano, kreu i stafit teknik u shpreh optimist për ecurinë e skuadrës, duke theksuar se objektivat janë plotësisht të arritshëm. “Duke marrë parasysh situatën aktuale dhe mënyrën se si kanë shkuar gjërat në katër ndeshjet e para, kemi mundësinë të konkurrojmë për një vend në gjysmëfinale. Megjithatë, rruga është ende e gjatë dhe ka shumë punë për t’u bërë, kjo është e sigurt“, u shpreh Mancini. Më tej, ai ndau opinionin e tij lidhur me angazhimin e talenteve të reja dhe politikat e klubeve. “Disa klube u japin mundësi lojtarëve të rinj, të tjera jo. Është detyra jonë t’i kërkojmë dhe t’i thërrasim, në mënyrë që t’i njohim personalisht. Kjo është arsyeja pse po afrojmë lojtarë të rinj me aftësi të mira teknike. Besojmë se, në një të ardhme të afërt, ata mund të shndërrohen në lojtarë të nivelit të lartë“, shtoi ai. Duke folur për zgjedhjet e tij në organikë, trajneri sqaroi pozitat e disa prej futbollistëve me përvojë dhe nevojën për të eksperimentuar. “Ne tashmë e dimë se çfarë mund të bëjnë Bernardeschi dhe Cristante; nuk ka nevojë t’i testojmë. Do t’i thërrasim kur të kemi nevojë për ta. Për momentin, duhet të eksplorojmë opsione të tjera – lojtarë më të rinj që kanë nevojë të fitojnë përvojë.“ Në përfundim, strategu italian preku edhe çështjen e futbollistëve me shtetësi të dyfishtë dhe përpjekjet e merkatos kombëtare. “Nuk jemi vetëm ne, çdo kombëtare përpiqet të afrojë lojtarë të talentuar që zotërojnë shtetësi të dyfishtë. Ndërkohë, kemi arritur të afrojmë Palma, i cili besoj se mund të shndërrohet në një mbrojtës vërtet të shkëlqyer. Ai kërkohej edhe nga Gjermania. Me të ia dolëm, ndërsa për lojtarët e tjerë do të shohim”, përfundoi Mancini.