Heqja e portretit të Presidentit historik Ibrahim Rugova, reagimet e ashpra për një akt të papranueshëm

Përtej mbajtjes së një emri me peshë historike, siç mund të jetë Gjergj, Gjon apo Justina, vlera e vërtetë dëshmohet vetëm përmes veprave konkrete atdhetare dhe krijuese, si dhe me respektin e merituar për personalitetet themeltare të kombit dhe të Dardanisë. Heqja e portretit të Presidentit historik dhe arkitektit të pavarësisë së Kosovës, Dr. Ibrahim Rugovës, përfaqëson një veprim të rëndë dhe të papranueshëm. Një akt i tillë dëshmon mungesë vetëdijeje për rrënjët tona, humbje të identitetit dhe mungesë të një vizioni të qartë për të ardhmen që synojmë të ndërtojmë. Në të kaluarën ekzistonte bindja se besimi i drejtimit të shtetit te një figurë me emrin Justina do t'u përcillte diplomatëve evropianë mesazhin se Kosova vazhdon të ketë pasardhës të denjë të Pjetër Bogdanit dhe Nënë Terezës. Megjithatë, realiteti po dëshmon të kundërtën, pasi emri vetë-vetiu nuk mjafton për t'i dhënë madhështi apo lartësi njeriut. Vetëm një jetë e ndërtuar mbi vepra të ndershme, që mbron identitetin evropian dhe respekton figurat që vendosën themelet e shtetit, i jep kuptimin e merituar çdo përgjegjësie dhe emri publik.