Manchester United në kërkim të trajnerit të ri: Pochettino kryeson listën, Conte refuzon projektin

Manchester United po përballet me pasiguri të thellë në stolin e skuadrës, pasi Michael Carrick duket gjithnjë e më larg vazhdimësisë në pozitën e trajnerit. Pavarësisht përpjekjeve për të stabilizuar ekipin, rezultatet e fundit nuk kanë qenë bindëse: pas fitores ndaj Romës në Ligën e Kampionëve, pasoi një barazim dramatik 4:4 me Aston Villën dhe një humbje zhgënjyese ndaj Chelseat. Në këtë situatë, drejtuesit e “Djajve të Kuq” kanë intensifikuar kërkimet për një strateg të ri, duke synuar që vendimi përfundimtar të merret gjatë periudhës së ndeshjeve të kombëtareve. Një nga emrat që ishte lakuar më së shumti, Antonio Conte, duket se i ka mbyllur derën kësaj mundësie. Burime pranë trajnerit italian bëjnë të ditur se ai nuk është i interesuar të marrë drejtimin e Unitedit, për shkak të situatës së paqartë brenda klubit, të cilën ai nuk e sheh si një ambient të përshtatshëm për të ndërtuar një projekt serioz. Pas refuzimit të mundshëm të Contes, vëmendja e klubit është përqendruar te Mauricio Pochettino, i cili aktualisht shihet si kandidati kryesor për të marrë drejtimin e ekipit. Në listën e alternativave për stolin e gjigantit anglez figurojnë gjithashtu emrat e Eddie Howe dhe Julian Nagelsmann. Klubi po kalon një fazë shumë delikate dhe pushimi ndërkombëtar pritet të jetë vendimtar për strukturimin e stafit teknik dhe qartësimin e rrugës që do të ndjekë Manchester United në të ardhmen e afërt.