I pajisur me armë zjarri dhe lëndë narkotike, bie në prangat e policisë 42-vjeçari me të kaluar kriminale në kryeqytet

Operacioni i koduar policor i quajtur “Kontigjenti” ka çuar në pranga një 42-vjeçar në kryeqytet, i cili qarkullonte i armatosur dhe në zotërim të lëndëve narkotike, pavarësisht se rezultonte me precedentë të mëparshëm penalë. Ndërhyrja e forcave të rendit është realizuar pranë zonës së liqenit të Çekrezës. Efektivët e Komisariatit të Policisë Nr. 5 në Tiranë ndërmorën këtë aksion pasi siguruan informacione operative se një individ i armatosur po lëvizte në mënyrë të dyshimtë në afërsi të liqenit, duke rrezikuar sigurinë Publike. Gjatë kontrollit të detajuar fizik të ushtruar ndaj tij, uniformat blu zbuluan dhe sekuestruan një armë zjarri pistoletë me mulli, municion luftarak përkatës, si dhe një sasi substance të dyshuar narkotike të llojit kokainë, të cilat i kishte me vete. Burimet zyrtare nga Policia bëjnë me dije se i arrestuari është shtetasi Zyber Bami, 42 vjeç, i cili më parë ka qenë i dënuar për veprën penale të mbajtjes pa leje të armëve luftarake. Dosja me dokumentacionin përkatës i është përcjellë Prokurorisë për hetime të mëtejshme.