Pse Spalletti po e mban në stol Zhegrovën? Trajneri i Juventusit zbulon arsyet e forta

Statusi i Edon Zhegrovës te Juventusi vazhdon të mbetet në qendër të vëmendjes mediatike, pasi ylli i Kombëtares së Kosovës nuk ka arritur ende të sigurojë një fanellë titullari në radhët e gjigandit italian. Impakti i jashtëzakonshëm që sulmuesi anësor ka dhënë sa herë është futur nga stoli ka bërë që mbështetësit e bardhezinjve të kërkojnë me ngulm më shumë minuta për të, duke bërë presion që trajneri Luciano Spalletti ta nisë ndeshjen me të nga minuta e parë. Megjithatë, strategu italian shfaqet i matur dhe ka arsyetuar zgjedhjet e tij taktike. Gjatë një interviste të dhënë në emisionin e njohur “La Domenica Sportiva” në “Rai Sport”, ai ka analizuar hapur pikat e forta dhe mangësitë e futbollistit dardan. Ndërsa ka pranuar vlerën e madhe që Zhegrova sjell kur inkuadrohet në fraksionin e dytë të lojës, Spalletti ka tërhequr vëmendjen te luhatjet që shfaq lojtari në duelet më komplekse. Sipas tij, pikërisht mungesa e ekuilibrit është pengesa kryesore që e mban atë jashtë formacionit startues. “Ndodhin situata si rasti i Zhegrovës. E sheh paraqitjen e tij paraprake dhe mendon se ai patjetër duhet të jetë titullar. Shpeshherë ai shkëlqen në 30 minutat e fundit. Por kur e hedh në fushë në sfida të vështira, ku ritmi alternohet mes sulmit dhe mbrojtjes, ose kur duhet të sakrifikosh prapa dhe nis gabimet, tabloja ndryshon. Një aspekt e bën shkëlqyeshëm, ndërsa një tjetër jo në nivelin e duhur. Na mungon ende ai ekuilibri i plotë”, ka pohuar Spalletti. Në këtë mënyrë, kreu i stafit teknik të Juventusit ka bërë të ditur se potenciali dhe shkathtësitë teknike të Zhegrovës janë të padiskutueshme, por ai kërkon stabilitet në të gjitha drejtimet e lojës. Në fakt, depërtimet e rrezikshme, driblimet një kundër një dhe elementi i befasisë mbeten armët kryesore që e veçojnë kosovarin në fushë. Pavarësisht kësaj, për Spallettin këto cilësi nuk mjaftojnë pa u shoqëruar me përkushtim taktik dhe angazhim të barabartë në mbrojtje. Këto komente të trajnerit vijnë në një moment kur pozita dhe e ardhmja e Zhegrovës te skuadra italiane po diskutohen gjerësisht, ndërsa lojtari synon të fitojë hapësirat e merituara për të vërtetuar vlerat e tij prej titullari.