Përgatitjet për “Prishtina 2030”, kryeministri Kurti mban takime kyçe në Paris me ekspertët francezë të sportit

Kryeministri i Republikës së Kosovës, Albin Kurti, ka zhvilluar një takim të rëndësishëm në kryeqytetin francez, ku në qendër të vëmendjes kanë qenë përgatitjet për organizimin e Lojërave Mesdhetare “Prishtina 2030”. Siç ka njoftuar Ambasada e Francës në Kosovë, takimi u zhvillua në Prefekturën e Île-de-France, duke mbledhur së bashku kreun e ekzekutivit kosovar dhe personalitetet kyçe që kanë udhëhequr organizimin e Lojërave Olimpike “Paris 2024”. Në këtë bashkëbisedim u shqyrtuan praktikat më të mira franceze, modelet e menaxhimit dhe impakti afatgjatë që një ngjarje e tillë madhështore i sjell kryeqytetit dhe mbarë vendit. Pala franceze ka konfirmuar vullnetin e plotë për t'i dalë në krah institucioneve të Kosovës, duke ofruar mbështetje përmes transferimit të dijes, këshillave profesionale dhe ekspertizës së fituar gjatë sfidës olimpike të këtij viti. Në njoftimin zyrtar thuhet: "Sot pasdite, në Paris, në Prefekturën e Île-de-France, u mbajt një takim ndërmjet figurave kryesore të përfshira në organizimin e Lojërave Olimpike Paris 2024 dhe kryeministrit të Kosovës, Albin Kurti. Diskutimet u përqendruan në mësimet e nxjerra nga përvoja e Francës në organizimin e Lojërave Olimpike 2024 dhe trashëgiminë afatgjatë që këto lojëra lanë për Parisin dhe Francën. Ekipi francez është i gatshëm të ndajë ekspertizën dhe përvojën e tij me Kosovën në përgatitjet për Prishtina2030. Falënderime të shumta për ambasadorin e Francës për Sportin, Damien Combredet-Blassel, Sophie Lorant dhe Eva Baldessin, përkatësisht presidente dhe drejtoreshë e France Sport Expertise, si dhe për të gjithë pjesëmarrësit në takim".