Goditje e rëndë për Izraelin: Dy mungesa të rëndësishme para përballjes me Kosovën

Përfaqësuesja e Izraelit do të përballet me dy mungesa të rëndësishme në kuadër të ndeshjeve të fundit të Grupit B3 në Ligën e Kombeve, ku fillimisht do të masë forcat me Kosovën, e më pas do të luajë kundër Austrisë. Në listën e futbollistëve që nuk do të jenë në dispozicion të trajnerit Ben Shimon spikat mungesa e talentit të njohur të Barcelonës, Orian Goren. Sipas njoftimeve të mediave izraelite të publikuara të hënën, 17-vjeçari është lejuar të lirohet nga grumbullimi për shkak të disa shqetësimeve muskulare në zonën e barkut. Edhe pse ishte përfshirë nga përzgjedhësi Ben Shimon në listën zyrtare për këto dy takime, Goren së fundmi kishte fituar besimin duke u ulur në stol me fanellën e Barcelonës në derbin e madh spanjoll kundër Real Madridit, në “El Clasico”. Përveç tij, shtabi teknik i Izraelit nuk do të mund të mbështetet as te Anan Khalaili, 22-vjeçari i cili luan në kampionatin anglez me skuadrën e Crystal Palace. Kombëtarja e Kosovës dhe ajo e Izraelit do të përballen mes vete të shtunën në Prishtinë, në një duel me peshë specifike për ecurinë në Grupin B3. Ndeshja e parë mes këtyre dy ekipeve, e cila ishte zhvilluar në neutralitet në Hungari, kishte përfshirë barazim pa gola, 0-0. Pas katër ndeshjeve të zhvilluara deri më tani, “Dardanët” pozicionohen në vendin e dytë të renditjes me pesë pikë të grumbulluara, ndërsa izraelitët mbyllin tabelën në vendin e fundit me vetëm dy pikë. Kjo situatë e bën sfidën e kryeqytetit vendimtare, me Kosovën që synon konsolidimin e pozitës së saj dhe Izraelin që kërkon kthesën në dy sfidat e mbetura. Pas ndeshjes me Kosovën, kalendari e rezervon për Izraelin duelin përmbyllës të grupit kundër Austrisë, i cili do të luhet tri ditë më vonë, ndërsa nga ana tjetër, Kosova do ta përmbyllë këtë cikël ndaj Irlandës.