Tragjedi në New York: Një viktimë dhe dhjetëra zjarrfikës në betejë me flakët në një pallat në Manhattan

Një ngjarje e rëndë ka tronditur orët e para të mëngjesit të së hënës lagjen Manhattan në New York, ku një zjarr masiv ka kapluar një ndërtesë banimi gjashtëkatëshe, duke lënë pas një viktimë dhe disa të lënduar. Flakët e fuqishme shpërthyen rreth orës 01:30 me orën lokale, brenda një banese të vendosur në katin e tretë të pallatit me adresa 660 Riverside Drive, saktësisht mes rrugëve West 143rd dhe 144th. Sipas njoftimit zyrtar nga Departamenti i Zjarrfikësve të New York-ut (FDNY), situata u komplikua tej mase për shkak se apartamenti ishte i mbushur me grumbullime sendesh të ndryshme. Përballë rrezikut të përhapjes së shpejtë, autoritetet shpallën alarmin e dytë në orën 01:47, duke mobilizuar menjëherë reparte shtesë. Gjatë aksionit intensiv të kërkim-shpëtimit, trupat e emergjencës arritën të gjenin një burrë pa shenja jete, ndërsa mjekët konfirmuan vdekjen e tij në vendin e ngjarjes. Një banor tjetër u dërgua me urgjencë në spital në gjendje kritike për jetën, kurse një person i tretë mori lëndime minore, por zgjodhi të mos pranojë ndihmën mjekësore. Gjatë operacionit të vështirë, dy pjesëtarë të forcave zjarrfikëse pësuar lëndime të lehta dhe u transportuan në spital për të marrë trajtimin e duhur mjekësor. Për neutralizimin e vatrës së rrezikshme dhe vënien e saj nën kontroll, u desh një dislokim masiv i strukturave të emergjencës, ku u përfshinë 46 mjete dhe rreth 141 zjarrfikës e punonjës të shërbimeve mbështetëse. Ekipet operacionale punuan me orë të tëra në terren për të frenuar flakët dhe për të shmangur dëmtimin e banesave fqinje brenda të njëjtit pallat. Der më tani, autoritetet nuk kanë publikuar të dhëna rreth identitetit të viktimës apo të personave të lënduar. Ndërkaq, shkaqet e sakta që sollën këtë shpërthim zjarri mbeten ende mister dhe po hetohen nga organet kompetente në New York.