Ndërhyrje e rrallë mjekësore: I hiqet tumori prej 3.1 kilogramësh nga hunda 71-vjeçarit

Një operacion delikat dhe i pazakontë është kurorëzuar me sukses nga stafi mjekësor i Otorinolaringologjisë, të cilët kanë hequr një masë tumorale me përmasa të jashtëzakonshme nga hunda e një pacienti. Bëhet fjalë për një gjendje shëndetësore alarmante ku një 71-vjeçar mbante në zonën e hundës një tumor me peshë prej 3.1 kilogramësh. Duke folur për këtë rast, kirurgu i ORL-së, Tedi Minarolli, u shpreh se ndërhyrja ishte me vështirësi mesatare, por madhësia e tumorit përbënte një rast të paprecedentë, duke arritur në 3.1 kg dhe 50 cm në hundë. Pacienti 71-vjeçar kishte statusin e të burgosurit, rrethanë kjo që ndoshta ndikoi në shmangien e kujdesit të duhur mjekësor, duke lejuar që tumori të zhvillohej në këto përmasa ekstreme. Situata ishte aq e rëndë saqë, në momentin e parë kur fotografitë iu dërguan kirurgut, ai e pati të vështirë t'i besonte. Nga ana e saj, shefja e shërbimit, Birkena Qirjazi, ngriti shqetësimin për numrin në rritje të pacientëve që paraqiten me vonesë në dyert e spitaleve, duke rënduar gjendjen e tyre. Megjithatë, ajo theksoi besimin e saj të plotë te aftësitë dhe suksesi i gjeneratës së re të mjekëve. Operacioni u krye me sukses të plotë nga ekipi i specializuar i ORL-së, i drejtuar nga shefja e shërbimit Birkena Qirjazi dhe kirurgu Tedi Minarolli, me kontributin e mjekëve Kristi Tata dhe Arli Kokomani, si dhe nën mbikëqyrjen e kujdesshme të stafit të reanimacionit dhe mjekëve të rinj.