Incident i rëndë sigurie në Uashington: Automjeti godet barrierat e Shtëpisë së Bardhë, pranga dy personave

Një situatë e tensionuar ka mobilizuar forcat e sigurisë në kryeqytetin amerikan, pasi një makinë është përplasur me pengesat mbrojtëse pranë kompleksit të Shtëpisë së Bardhë, duke ngritur alamin për një shkelje të mundshme të perimetrit të sigurisë. Ngjarja është regjistruar pak çaste para orës 16:00 me orën tonë lokale. Dëshmitë dhe raportet e para tregojnë se shoferi i mjetit, i cili dyshohet se mbante armë zjarri me vete, është neutralizuar dhe vënë në pranga në vendngjarje nga agjentët e sigurisë. Menjëherë pas këtij zhvillimi, autoritetet kanë proceduar me arrestimin e një personi të dytë të lidhur me incidentin. Pas sinjalizimeve se dyshuari mund të ishte i armatosur, njësitë speciale dhe forcat e rendit kanë ndërhyrë me shpejtësi, duke rrethuar të gjithë perimetrin me një kordon të rreptë sigurie për të parandaluar çdo rrezik të mundshëm. Si pjesë e protokolleve standarde të emergjencës, Shtëpia e Bardhë u vendos në gjendje izolimi, ndërsa gazetarëve dhe ekipeve mediatike që ndodheshin në ambientet e jashtme iu dha urdhër të tërhiqeshin menjëherë brenda godinës. Situata u trajtua me gatishmëri maksimale edhe për shkak se zëvendëspresidenti amerikan, JD Vance, po mbante një fjalim në afërsi të menjëhershme, saktësisht në ndërtesën e JPMorgan e cila ndodhet pak metra larg rezidencës presidenciale. Autoritetet kompetente nuk kanë publikuar ende hollësi shtesë mbi arsyet apo motivet që çuan në këtë përplasje, ndërsa konfirmohet se vijojnë hetimet për të zbardhur plotësisht rrethanat e ngjarjes.