Bashkëpunimi ushtarak në fokus: Ministri Maqedonci pret në takim ambasadorin belg

Ministri i Mbrojtjes, Ejup Maqedonci, ka zhvilluar sot një takim zyrtar me ambasadorin e Mbretërisë së Belgjikës në Kosovë, Arnaud Dusaucy, në kuadër të vizitës së tij të parë njoftuese pas marrjes së detyrës së re. Gjatë këtij takimi, ministri Maqedonci shprehu mirënjohjen e tij për mbështetjen e palëkundur që Belgjika i ka dhënë vazhdimisht Republikës së Kosovës, me theks të veçantë në sektorët e sigurisë dhe mbrojtjes. Në njoftimin zyrtar bëhet e ditur se palët trajtuan mundësitë e intensifikimit të partneritetit dypalësh. Gjatë bisedës u vlerësua lart akreditimi i atasheut të mbrojtjes të Republikës së Kosovës në Belgjikë, ndërsa u theksua edhe domosdoshmëria e jetësimit të letërqëllimit të përbashkët ndërmjet dy qeverive, me qëllim zgjerimin dhe forcimin e mëtutjeshëm të bashkëpunimit ushtarak.